[dropcap]М[/dropcap]айрал 20-нний Дагъусттаннал БакIчи Владимир Васильев гьуртту хьунни Аьрасатнал Президент Владимир Путиннул ВКС-рал низамрай дурсса экономикалун ва социал лагрулун кумаг баврил хIакъиравусса батIаврий.
[dropcap]М[/dropcap]уний ххал бивгьунни инсантуран кумагрансса, социал лагрулунсса ва аьмну экономикалун кумагрансса чаранну дузрайн буккан баврил ялув бацIаву даврил масъалартту, кьимат бивщунни властрал идарарттал давурттан. Мукунма ххал бивгьунни азарханардал ва поликлиникарттал зузалтран кумагрансса хIукмурду бартбигьаврилми масъалартту.
Владимир Путиннул бувсунни майрал 6-нний къулбас дурну диркIшиву чара бакъасса медициналул зузалтрал паччахIлугърал оьрмулул страхованиялул хIакъиравусса ХIукмулий. Мунийн бувну ХIукуматрайн, Минздраврайн, Минтрудрайн, федерациялул субъектирдайн тапшур бувну бивкIшиву ккаккан дурсса цинярда выплатартту дулун.
БатIаврий ПаччахIлугърал БакIчинахь бувсунни экономикалун кумагрансса цинярда давурттал хIакъираву.
БатIаврий махъ лавхъунни АьФ-лул ХIукуматрал Председатель Михаил Мишустиннул. Мунал тIимунийну, медициналул зузалтран дагьайсса арцу дулаву – му приоритетри. Арцу цинявппа зузалтран итадаркьуну дур, яла гъансса чIумуву ми дулун аьркинну дур медициналул зузалтран.
Аьрасатнал цIуллушиву дуруччаврил министр Михаил Мурашкол бувсунни медициналул зузалтран дагьан дурсса ялун ххи дурсса страхованиялул гарантиярттал хIакъираву.
Выплатарттансса арцу регионнайн диян даврил хIакъираву бувсунни Федерал казначействалул БакIчи Роман Артюхиннул. Аьрасатнал экономикалул министр Максим Решетниковлул бувсунни чIиримур ва дянивмур бизнесран ялун ххи бувсса кумаг баврил хIакъираву.
АьФ-лул захIматрал министр Антон Котяковлул бувсунни цалрхIал оьрчIан дулайсса 10 азарда къуруш дуллай байбишинтIий бушиву июньдалул 1-нния махъ. Мунал бувсунни мукунма оьрчIан дулун ккаккан дурсса цаймигу арцул хIакъираву, цIусса кредитрал программа бартдигьаврил хIакъираву.
БатIаврий ялагу махъру лавхъунни Федерал налогирттал къуллугърал каялувчи Данил Егоровлул ва ЦБ-рал БакIчи Эльмира Набиулинал.
БатIаврил хIасиллу дуллалисса махъ лавхъунни АьФ-лул Президентнал.
