[dropcap]М[/dropcap]айрал 18-нний ДР-лул БакIчи Владимир Васильев, ДР-лул Халкьуннал Мажлисрал Председатель Хизри Шихсяидов ва ДР-лул муфти АхIмад-ХIажи Аьбдуллаев гьуртту хьунни Аьрасатнал Президент Владимир Путиннул видеоконференциялул низамрайсса батIаврий.
Ххал диргьунни жулла региондалийсса эпидемиялул тагьар. КIанттурдай давуртту сакин даврил хIакъираву паччахIлугърал БакIчинахь бувсунни региондалул БакIчи Владимир Васильевлул. Мунал мукунма бувсунни Оператив штабрал республикалун бувсса кумаграятугу – региондалун буллуну бур 210 инсаннансса палаткарттал центр, му бакъассагу, Дагъусттаннайн тIайла бувккун бур 2 группа пишакартуралгу. ДР-лул БакIчинал тIимунийну, аьркинну бур гьантлун сайки 3000 тест буллан. ЦIанасса ппурттуву даруртту букIлан бивкIун бур тамансса лагрурдай. Миннул ялув бацIаву дуллай дур программалул. ХIакьину азарханардан аьркинссаксса дур маскардугу, катIригу. Васильевлул бувсунни республикалий зий душиву производство, микку дуккан дуллай бушиву маскарду, катIри ва цаймигу затру: «ЖучIа цIана зий бур 116 идара (предприятие). ДакъарцIуну зий дур строительство, аграрий комплекс, ххуллурду буллайнма бур бацIаву дакъа, Роспотребнадзорданул миннул ялув бацIаву дуллай бур. ЦIанасса жул мурад бур азарданул цаймигу кюртти хIасул хьун къабитаву ва экономикалул каширду гьарза даву», — увкунни Владимир Васильевлул.
В. Васильевлул Президентнахь бувсунни региондалий аьркинну бушиву инфекциярттал госпиталь.
Хизри Шихсяидовлул бувсунни гьашинусса шинал бюджетраву коронавирусрал инфекциялуцIун дархIуну хьусса дахханашивурттая.
БатIаврий ихтилатру бунни мукунма Дагъусттаннал муфтий АхIмад — ХIажи Аьбдуллаевлул, АьФ-лул цIуллушиву дуруччаврил министр Михаил Мурашкол ва Аьрасатнал хъунмур санитар хIакин Анна Поповал.
БатIаврил хIасиллу дуллай, Владимир Путиннул кIицI бунни Дагъусттаннай тагьар захIматсса душиву ва мунийн бувну дунни цаппарасса тапшурлугъру.
Билаятрал Минздраврайн тапшур бунни Дагъусттаннал Минздравран ялунсса кумаг буван тест системарттал, дарурттал дузал баврил, оборудованиялул, зузалтрал чулухатугу хIисавну. Президентнал тапшурлугъру дунни мукунна Аьрасатнал Роспотребнадзорданийн, МЧС-райн. Обороналул министерствалийн тапшур бунни региондалий анаварну дузал буван 200 кIану бусса многофункционал медициналул центр.
Яла Владимир Путин лаивзунни дагъусттанлувтурайн:
«ЦIанасса ппурттуву жулла цачIусса давурттайн, республикалул агьалинал хIарачатрайн, зу хlакинтурал маслихIатирттайн чул бивщуну къуццу тIутIаврийн, жаваблувшиврийн хъар хъанахъиссар Дагъусттан бюхъайссаксса ччяни эпидемиялул тагьарданува буккаву. Жула инсантал буруччаву – вари цIанасса ппурттуву яла агьаммур». Президентнал бувсунни, аьмсса балаллувату букканшиврул, цащава шаймур бантIишиву.
