«Аякьалул вакцинар баруну бацIантIисса»

Сагъират Ссунгъурова

ЦIунилгу коронавирусрая цIухху-бусурду буллайнма буру дазул кьатIув ялапар хъанахъисса дагъусттанлувтурахь. Кказитрал хьхьичIмур номерданийгу Дубайливсса тагьардания бувсуна жул коллега Сагъират Ссунгъуровал.

— ЖучIа уттигу къуртал хьун бувар карантин. Ялунгума утти комендант ссятругу баян бунни. Ваксса бурувччуну буна, къашайшалтрив ялу-ялун гьарза хъанай най бур. КъакIулли гихуннайсса тагьар та къулай хьунссарив.
Ттучандалийн, ягу аптекрайн лавгсса инсанная полиция тIалав дуллай бур чекру. Ихтияр дуллунни так яла чара бакъами продукты машан ласун ттучаннайн, аптекрайн ва, иш багьсса чIумал, азарханалийн гьансса.

Ттучандалия, аптекрая ягу хIакинначIату цала машиналий нанисса инсан ухьурчан, полициялул зузалтрал цайра аьчIа къадишиншиврул ккаккан дан аьркинссар чекру, рецептру, хIасил цивппа ссал хъирив лавгун бивкIссарив тасттикь буллалисса документру.
Цаппара гьантрал хьхьичI машинарттансса пропускру ду­ссия дуллай. Утти миннуйгу къадагъа дирхьунни. Радарду дирхьуну, транспортрал хъирив бавцIуну бур.

КIира нюжмардийсса лахъи бунни уттигу оьсса кьанунну дусса карантин. Вай кIира нюжмардул мутталий кулпатрава ца инсаннахьхьун дуллунни ттучандалийн занансса ихтияр. Мугу маскагу, катIригу ларххун, мет­ра ва дачIиннул манзилданий цама инсанначIан гъан къавхьуну занансса.
Нава бура, агана вакссава кьянкьасса карантинвагу баян къабувссания, цикссава инсантурайх кьини дукканавав тIий. Уттинин жучIа коронавирус ду­сса 2076 инсан хьунни, миннава так 167 инсан хъин хьунни. Яла тIааьн бакъамургу ва вирус лархъсса инсантал хъунмасса хIаллай хъин буллан багьайсса бушивруву бур.

Жу жувагу цIухлайнма, кIул буллайнма буру цайми билаятирттай ялапар хъанахъисса жула дустурахь, цукун буручлай буру коронавирусрая тIий. ХIакьинусса кьини цинявппа, ца зумату кунма, исват буллай бур, инсантал так цала ичIува бацIаврийну ва ккаккан дурсса гигиена дуруччаврийну бакъа мюхчан хъанай бакъашиву. «Шаппа бацIияра!». Зий-занай, зулва кулпатирттах аякьа дан­сса чIун дакъа бивкIсса инсантал цахъис бунугу рахIат буккира. Ххари хъанахъияра кувнная кув. Лякъияра зунна ичIурасса чIун мюнпатну гьан дуллансса чаранну. ХIарачат бара ссавурданий ва захIматсса тагьарданува буккансса.

ДакIния къабуккай Германнал машгьурсса психотерапевт, ттулва хъинсса дус Ева Пьент­ккал махъру: «Жува оьмуния пикрирду буллалисса чIумал, хъиннува кIункIу буллали­ссару оьшиву-оьбалартту. Инсан оьсса пикрирдал цала цува кьуцIу уллай, багьтIатIал хьуну, туннурдацIа шайссар», — тIисса аькьилсса махъру. Мунияту, нигьагу къабувсун, зула дакIнива оьсса пикрирдугу буккан бувну, зулла иммунитетгу хьхьара хьун маритару.

Ва дуниялгу укунссагу, ванияр захIматссагу кьинирду дурхIусса дуниялли. Цамур чулухагу, ва вирусрал жунма багьайсса куццуй ккаккан бунни инсаннал оьрмулул кьадру. Так кувннал кувннахсса ччаврил ва аякьалул «вакцинар» баруну бацIантIисса ва вирус дух дан.
Бурувччуну бикIияра, ттул аьзизсса миллат!

ХIадур бувссар
Имара Саидовал

Читайте также: