[dropcap]Щ[/dropcap]алагу дунияллий коронавирусрацIун дархIусса тагьар хIасул хьуния шинмай дазул кьатIув ялапар хъанахъисса лак лабизлайнма бур жула миллатрайн, чансса хIаллай ссавур дурну,

зула-зула ичIува бавцIуну, бурувччуну бикIияра тIий. Миннаватусса цану ур инстаграмраву Американавусса лак цачIун буллалисса лажин нани дурсса машгьурсса спортсмен, Кьубиял шяравасса, цIанакул Лос-Анджелес шагьрулий ялапар хъанахъисса Исяев ХIажи Аьбдулмажидлул арс.
Коронавирусрал оьхIалсса ххяппухьхьун биривсса билаятирттавасса ца яла кьини дуркмурну бур хIакьину Америка.
Жулгу, ХIажиналгу дянив хьунни чIиви-хъунсса ихтилат. Махъ булунну ванахьхьун.

---

 

— Мяйжаннугу, хIакьину аме­риканал паччахIлугъ хар-хавар бакъа ялун дирсса вирусрал ясир дурну лирчIун дур. ХъунмурчIин вирусрал къашай хьусса инсантал бия Нью-Йорклив ва Калифорниянаву. Мунияту тикку баян бувну бу­ссия оьсса карантингу. На ялапар хъанахъисса Лос-Анджелесрай ялапар хъанай бур 18 миллион инсантурал. Лос-Анджелесрай коронавирусрал ивкIунни 7 инсан. Бюхъайва ва сияхI хъиннура хъуннасса хьунгу, агана вайннал агьали низам дуруччин кIулсса къабивкIссания. МахIаттал хьуну икIара шиккусса инсантурал паракьатшиврий, къалмакъаллу дан махъаллилсса бушиврий.

Хьхьунил ссят 11-нния байбивхьуну, ссят 5 хьуннин бацIаву дакъа дуллай бур дезинфекциялул давуртту. Гьай-гьай, хъуннасса аякьа дур карантин сававну шаппа щябивтсса инсантурах. Налогру дуллай бивкIсса, давуртту дакъа ливчIсса гьарца инсаннан карантин баян був­ссаксса хIаллай зуруй 1200 доллар, оьрчIан 500 доллар булун ккаккан бувну бур. Банкирдая кредитру ларсун бивкIсса агьалигу, ца банкрал ца зуруйсса личIаннин, вайминнул шанма зуруйсса кредитру дулаврил му­тта лахъи бунни. Американаву­сса инсантал чIявуми бур лая­къатрай ялапар хъанахъисса.

Цанчирчан шикку, къатта-къуш машан ласаврияр, арендалий ялапар шаву кьюркьуну дацIлай дуну тIий. Къатта-къушлихсса багьри булаврил муттагу авазалул чIун къуртал хьуннин лахъи бунни.
Къадагъа дирхьуну, лавкьуну буссия цинявппагу машлул идарартту. ТIивтIуну бия так аптекарду, ттучанну ва связьрал салонну. ХIакьинусса кьини Лос-Анджелесрай бур ряхцIалвахъул мизитру. ЦIана мигу лавкьуну бур. Мизитирттава ца яла машгьурмур бия хъаннил мизит, мунил къаралгу бур хъанния хIасул хьусса. Вай иширттацIун бавхIуну, гьай-гьай, мугу лавкьуну бур.
Дуклаки оьрчIру дистанциялул режимрай дуклай бур.

[dropcap]Ш[/dropcap]коларттай тIивтIуну бур дукия-хIачIиялул пунктру. ИчIура дукра дан сант дакъасса дуклаки оьрчIаща, хъуниминнаща бюхълай бур, вай пунктирдайн бувкIун, хIадурсса дукра ласун.
Му бакъассагу, шикку ялапар хъанахъисса зувиазарунния ливчусса оьрус миллатрал инсантурая сакин хьусса группалувусса инсантал чичлайнма бур, цуманан ци аьркинну дур, диян данну, ларсун бучIанну тIий, кувн­нал кув чIарав бацIлай.
Медициналул вузирдаву дук­лакисса, къуртал бан шанма-мукьва барз ливчIсса студентътуран дипломру буллуну, азарханардай зун гьан бунни.
Американавусса тамансса миллионертурал чIярусса арцурду итадаркьунни ихIсандалул фондирттан. Цаппараннал цала предприятиярттай байбивхьунни коронавирус ххал дайсса тест­ру байсса заводру буллай, ца­ппарагу антисептикалул кьай-кьуй итадакьавриха зий.

Ларгсса алхIаткьини Американал Президентнал баян бунни 28 штатрай, пандемиялул тагьар къулай шаврийн бувну, инсантуран давурттай зун­сса ихтияр дуллушиву.
Ххирасса Ватанлувтал, ишираву хъунмасса бияла бу­ссар жухьвагу, жулва жува бурув­ччуну бикIансса. Чансса ссавур дара, мугъаятну бикIияра. Заннал кабакьаврийну, цимурца цила ххуттайн дагьантIиссар ва, нукIува кунма, щирикIинтIиссар жула оьрмугу, — тIий ур лакрал миллатрахь ХIажи Исяев.

ДакIнийн бутанну ХIажи кIийла гьуртту хьуну ивкI­шиву Надир Хачилаевлул дуллай ивкIсса «Ккавкказнаву – дакьаву, талатаву – спортрал майданнив» тIисса ххаллилсса турнирдай. ХIажи, боксрал дунияллул даражалийсса цикссагу турнирдай гьуртту хьуну, хьуссар СНГ-лул ва Азиянал чемпион.

2003 шиная шинай ва зий ур маркетологну Швейцариянал, Африканал ва Азиянал компаниярттай. Мукуна ва ур Щалагуаьрасатнал экстремал гужирдал жяматийсса идаралул вице-президент. ХIажинал хIасул дурну дуссия «Аслан Чай» тIисса компаниягу. Чил билаятрайн гьаннингу, жагьилтал спортрахун машгьул баву мурадрай, Дагъусттаннай ванал тIивтIуну буссия «Кунак» тIисса футболданул школарттугу.
ЦIана ва ур маркетологну ва чIава жагьилтурал психологну.

Цува Ватандалия архну ялапар хъанай унагу, мудангу жула миллатрал буруккинттарай­сса хIакьсса патриотгу ур. Гьашинусса шинал ссуттихунмай, ХIажинал ва шийх ялапар хъанахъисса лакрал сипталийн бувну, пикрилий бур Ккуллал ва Лакрал райондалийсса жагьилтурал дянив лечаврил марафондалул акция дансса. Ва марафондалий, кIирагу райондалул шяраваллава байбивхьуну, жагьилтал левчуну бучIантIиссар Гъумучиял шяравун бияннин. Марафон баян бан хьхьичI кьини, цинявппа гьурттучитурал Лак­рал ва Ккуллал райондалийсса паччахI ххуллурдацIух кьюкьрай бугьантIиссар мурхьру. Ва акциялул хъунмур мураднугу хъанахъиссар 10-хъул шиннардил мутталий 100 азаруннийн бивсса мурхьру Лакрал ва Ккуллал районнай бугьаву. Американаву ялапар хъанахъисса лакрал бакIрайн лавсунни ва даву дузрайн дуккан дансса харжлугъ бишинсса.

— Ва пикри бакIравун був­ххун кIира шин хьунни, утти, Аллагьнал кабавкьуну, пикрилий ура дузрайн буккан бавриха зун. Укунсса марафондалий цалчин на гьуртту хьура Тамбовскаллал областьрай. ХьхьичIсса шинал та марафондалий гьуртту хьуна 67 инсан. Мукьилчинсса шинал марафондалул гьурттучитурал сияхI лархъунни 4000 инсаннайн. Тания шинмай бугьарду сайки 8000-хъул мурхьру, — тIий ур ХIажи.

Имара
Саидова