[dropcap]А[/dropcap]прель зурул 17-нния шинмай МахIачкъала шагьрулул Цалчинмур азархана байбивхьунни COVID-19 коронавирусрал инфекция дусса къашайшалт кьамул буллай.
З. Тахакьаева
[dropcap]К[/dropcap]ьамул бай отделениялул хъунама МахIаммадссалам Ссаламовлул бусаврийн бувну, цалчинсса шанма гьантлул дянив азарханалийн иян увну ур 35 къашайшала. Вайннава мукьа ур Covid-19 тасттикь хьусса, ливчIми – пневмония дусса. Шама къашайшала усса ур ИВЛ-аппарат бивхьуну.
[dropcap]Ш[/dropcap]икку къашайшалт кьамул буллан хIадур хъанай байбивхьуну бур республикалий коронавирусрал тагьардания баян байхтува. Хъунама хIакин ХIажимурад Маллаевлул бусаврийн бувну, кутIасса чIумул мутталий хIадур бувну бур 250 тах. Вай гьантрай хIадур бантIий бур 750 тах ттигу. ХIадур бувну бусса бур 210 хIакин, 350 медсестра, 220 санитарка.
[dropcap]В[/dropcap]анал ххи бунни азарханалун кумаг буллай бушиву меценатътуралгу. Сенатор Сулайман Каримовлул буллуну бур 4 ИВЛ аппарат, 4 ИВЛ аппарат мукунма буллуну бур «Лекарь» тIисса медцентр хIасул бувсса МахIаммад Ибрагьимовлул. Халкьуннал Мажлисрал депутат МахIаммад Садулаевлул дуллуну дур 1000 медициналул костюм. «Каспий-Лада» идаралул чулуха дуллуну дур респираторду.
Гьарца кьини азарханалий лахьхьин буллай бур коронавирусрал инфекция дусса къашайшалт кьамул бан.
ХIакьинусса кьини ва азарханалий ур гьутрурдал къашайшиву дусса 62 инсан.
