[dropcap]А[/dropcap]прель зурул 11-нний Аьрасатнал Федерациялул ПаччахIлугърал Думалул депутат Аьвдулмажид МахIрамовлул, щалагу билаят­рай коронавирусрацIун дархIусса тагьардануцIун бавхIуну,

агьалинащалсса ирглийсса хьунаакьаву дунни дистанциялул журалий.

---

Имара Саидова
Хьунабакьаврия бувсунни региондалийсса Д. Медведевлул приемнайлул пресс-къуллугърал.
Ва кьини депутатнайн бувк­сса ЦIуссалакрал райондалиясса хъамитайпалул масъала бия кьариртсса къатрах булун ккаккан бувсса компенсациялул хIакъиравусса.

Ванил бувсунни цуппа 89 шинавун дирсса ни­ттищал ялапар хъанай бушиву ва хIакьинусса кьини бизан бувсса инсантуран булун ккаккан був­сса компенсация ласун къахъанай ливчIун бушиву. Ва масъала дузал баврил хIакъираву депутатнал аьрза гьан бунни райондалул администрациялийн.

Хъирив депутатнайн лаивз­сса ТIиларатIиял райондалия­сса Хиндах шяравасса Асельдер Аьбдуллаевлул бувсунни Микьдат тIисса, хъунмасса хIаллай инсантал ялапар хъанай къабивкIсса, шяравалу цIу дуккан дансса ниятрай бушиву. Инсантал махъунмай Микьдатлив зана бикIланшиврул хьхьичIва-хьхьичI аьркинну бур Хиндахлия Микьдатливсса 3 километралийхсса ххуллу бан. МахIрамовлул махъ буллунни Республикалул Транспортрал министерствалийхчIин ва ма­съала щаллу бан кумаг бансса.

Лакрал райондалиясса Гьун­чIукьатIрал шяравасса кулпат­рал масъала бия цанна кка­ккан дурсса аьрщарал документ щаллу баврил хIакъиравусса. Депутатнал ва масъалагу, райондалул администрациялийн увккун, щаллу баншиву бувсунни.

Аьвдулмажид МахIрамовлул, агьалинал масъаларттах вичIи дишаву бакъассагу, цIухху-бусу бунни ва кIул бунни ко­ронавирусрацIун дархIусса районнайсса тагьарду цукун­сса ду­ссарив.