Давдил арс Увайсов Увайс
Апрель зурул 19-нний, оьрмулул 79 шинаву, хъунмасса хIаллай къашавайгу ивкIун, аьпалухьхьун лавгунни Ваччатусса Давдил ва Марияннул арс Увайсов Увайс.
ЧIивину унува ппугу яла лавгун, захIматсса, дяъвилул шиннардил ккаши-мякьсса чIумувухгу уккан багьссар ванан. БуттауссичIа ЦIуссалаккуй Кишайннал школалия байбивхьуссар ванал дуккаврил оьрму. Яла, ЦIуссаккулувсса школалийгу дуклай ивкIун, Хасаврай ацIва классгу къуртал бувну, дуклан увхссар Орджоникидзеллал институтрал тарихрал ва географиялул факультетрайн. 1966-ку шинал, дуккавугу къуртал дурну, зана хьуссар Дагъусттаннайн. Цаппара хIаллай Дагъусттаннал учительтал шайсса институтраву географиялул лекцияртту ккалайгу ивкIун, 1972-ку шинал зун ивкIссар экскурсоводну Тахо-Годил цIанийсса тарихрал музейраву. Гиву зийгу ивкIссар оьрмулул ахир хьуннин.
Махъсса шиннардий ва ия музейрал ца яла хьхьичIунма зузалану. Ванан ххуйну кIула музейрал давуртту. Гиву зузиссаксса шиннардий Увайслул чивчуссар музейрал давуртту аьч дуллалисса луттирдугу: «Аулы-крепости» (2000 ш.), «Дагестан фронту» (2010 ш.), «Диалог с историей» (2020 ш.).
Ххуйсса зузала акъагу, Увайс ия лап хIал бавкьусса инсангу. Ванал хIалал дурссар Дагъусттаннал культуралул лайкь хьусса зузалал цIагу. Цал аьпа баннав, рухI алжаннун лайкь хьуннав!
Увайс оьрмулува лавгсса кьурчIишиву кIидачIлай буру ванал кулпатрахь, арснахь, уссу-ссихь ва цинявппагу маччаминнахь.
Ванан къабуллусса оьрму махъминнан булуннав!
Ваччиял жямат
ДакIнихтунусса кьурчIишивугу кIидачIлай, жижара буллай буру Ссугъури Увайсовлухь ва цинявппагу гъан-маччаминнахь, журналист ва чичу, Дагъусттаннал культуралул лайкь хьусса зузала,
Давдил арс Увайс Увайсов
дунияллия лагаврийн бувну. Ванал рухI хъинний дишиннав, махъминнал оьрмурдай барачат бишиннав!
Мариян Илиясовал цIанийсса
«Дараччи» фонд
Аьбдулхаликьлул душ Акаева Светлана
Апрельданул 15-нний оьрмулул 58 шинаву аьпалухьхьун лавгунни ХьурукIратусса Аьбдулхаликьлул душ Акаева (Муртазялиева) Светлана.
Светлана бувну бур 1962 шинал. 1982 шинал дянивмур даражалул школа къуртал бувния шинмай байбихьлай бур ванил захIматрал ххуллу. Най бунува Хьурттал совхозрал фермалий дояркану зун бивкIун бур. Оьрму чIавасса бунугу, Светланал бакIрайва чIалачIи бувну бур цила пиша кIулшивугу, организаторнал пагьму-гьунаргу.
КъачIявусса бикIай ва оьрмулул 23 шинаву та чIумалсса ДАССР-данул Верховный Советрал депутатну бувчIин лайкь хьуми.
Светланал, цила дояркал даву дакъассагу, хъуннасса хIала-гьурттушиву дайссия жяматийсса давурттавухгу. Ва бивкIссар та чIумалсса ВЛКСМ-рал райкомрал членгу. Лайкь хьуну бивкIссар Лакрал КПСС-рал ва ВЛКСМ-рал райкомирттал ХIурматрал грамотарттан, шяраваллил хозяйствалул министерствалул ХIурматрал дипломран. Дуллуну диркIссар ВЛКСМ-рал ЦК-лул «XI ххюшинал жагьилсса гвардеец» тIисса лишан. 1986 шинал ванил лайкь дурссар ЗахIматрал Славалул орденгу.
Ялун дирсса хъуннасса кьурчIишивугу кIидачIлай, дакIнихтунусса жижара буллай буру ванил кулпатрахь, гъан-маччаминнахь. Цил бунагьирттал аьпа баннав, рухI бигьаний дишиннав.
ХьурукIуллал, Хьурттал,
Арчуттиял жяматру
ДакIнихтунусса кьурчIишиву кIидачIлай, жижара буллай буру жулва «Илчилул» дус-ихтивар,
Бархъаллал шяраватусса Мариян Кьаландаровахь, ванил аьзизсса буттарссу, Каспийскаллал № 8 лицейрал бусравсса педагог,
Кьаландардул душ Абакарова ПатIимат
дунияллия лагаврийн бувну. Цув алжаннул ххари буваннав, зухьхьунна цIуллушиву дулуннав!
«Илчилул» коллектив
Сиражуттиннул арс Увайсов ТIажиб
Апрель зурул 5-нний, хар-хавар бакъасса бивкIулул оьрмулул арулцIалла шинаву жуятува личIи унни Ваччиял шяравасса Увайсхъал ТIажиб.
ТIажиб увну ур 1950-ку шинал МахIачкъалалив. МахIачкъалаллал 16-мур школагу къуртал бувну, увххун ур Аьшттарханнайсса Мореходный училищалувун. Гагу къуртал бувну, лавгун ур армиялийн. Махъунай увкIун махъ зун увххун ур МахIачкъалаллал портрайн. Зий ивкIун ур жамилий. Гикку жагьилтуран лахьхьин буллан ивкIун ур ушу-сандалий ва боксрай буклан.
2000 шинал, Москавлив лавгун, зий ивкIун ур тих тренерну. Ванан дуллуну дур боксрал спортрал мастершиврул кандидатнал цIагу. Тренерну зий ТIажиблул хьуну дур 40-50 шин. Му чIумул мутталий ванал лайкь дурну дур «Дунияллул халкьуннал дянивсса категориялул судия» тIисса цIагу.
Ва ия цала пиша лап ххуйну кIулсса, спортсментал лахъсса даражалийн кIункIу буллалисса тренер.
ТIажиб оьрмулува лавгсса къумашивугу кIидачIлай, жижара буллай буру ванал уссу-ссихь, оьрчI-душваврахь, гъан-маччаминнахь. Цал бунагьирттал аьпа баннав, алжаннул ххари аннав.
Ваччиял жямат,
дустал, гьалмахтал
