[dropcap]М[/dropcap]ахъсса зуруй, ва суалданухьхьун жаваб дуллай, коронавирусрая бакъасса, цамур иширая бусансса цучIав къавхьунни.
Ва нюжмар цукун дакIний лирчIссарив буслай бур Таиландрай ялапар хъанахъисса ккули душ, МахIмудлул душ Кьурбанова Татьяна.
Имара Саидова
— Жугу щалагу дунияллул билаятирттайсса агьалинавух буру коронавирусрал ясир бувну. Гьай-гьай, бувчIлай бур, агьали ичIунмай бакьаврил мурад миннал цалва оьрмурду мюхчан баврил цIанийсса бушиву. Мунияту жугу буру, март зурул ахирдания шинмай, ххишаласса нигьачIаву дусса чIунгу баян бувну, низамрай бавкьуну къуццу тIий.
Лавкьуну бур хъунисса машлул центрду, гостиницарду, ттучанну, дарцIуну дур турфирмардал давуртту. Так тIивтIуну бур аптекарду ва дуки-хIачIиялулми ттучанну. КIантту-кIанттурдайсса властирдал хIукмурдайн бувну щаллу-ккурккину лавкьунни чIявуми провинциярду ва шагьрурду. Утти вай шагьрурдайн, ягу вай шагьрурдая щищакIуй гьан-учIансса ихтияр дакъар. Масалдаран, ттул уссу ялапар хъанахъисса Сиамский заливрайсса Ко Чанг шагьру бур щалва лавкьуну, тиккува ялапар хъанахъиминнаща бакъа, та шагьрулийн цайминнаща бучIан хъанай бакъар. Цинявппагу Тайский школарттай май зурул 16-нний къуртал хьунтIий диркIсса каникуллу лахъи дунни июль зурул 1-ннийнин. Вай гьантрай хIукму бунни школартту дистанциялул журалий зузи бувансса. ТIайламур бусан, ва режим дур бакъа чаралий дурсса, дуклаки оьрчIан къулайшиву дакъасса. Щалла хъиривмур нюжмардий Таиландрай шадлугърал даражалий кIицI лагайссар Сонгкран ЦIусса шинал байран. Вай иширттацIун бавхIуну му байрангу дан къабивтунни. ЧIумуйнусса даву дакъа ливчIсса инсантуран дуллай бур 5000 бат, Аьрасатнаву ми хъанай дур сайки 10000 къуруш. Мукунма, вай ишру сававну инсантуран хъанахъисса зараллу хIисавравун лавсун, баян бунни кредитру дулавринсса каникуллу. На навагу кредитрай машина лавсун буссар. Банкрайн оьвкусса чIумал, ттухьхьун шанма зуруй арцу къадулунсса рухсат буллунни. Бур мукунма вай шанма зуруй ттукIрахсса багьригу лагь бантIиссар тIий.
Вай ишру байбивхьуния махъ, самолетру леххан къаритлай, жучIа чIявусса туристътал ливчIунни, махъунмай зана хьун къабюхълай, мюрщисса оьрчIащал аэропортирдай гьантта бикIлай. Утти туристъталгу чан-чанну тIий тIайла буклай бур. Шиккува ливчIссагу чIявусса бур. Цаппарасса ресторанну лавкьуну бунагу, уква миннан дукрарду дуллалиссагу хьунни, цавайнналгу миннахьхьун чIумуйнусса ялапар хьун цалва къатта-къуш буллунни. Вай цивппагу мюрщисса оьрчIащал, арцугу духларгун, хъинну язугъну ливчIун бур шикку.
ХIукуматрал хъуниминнал, аваза хьун къабивтун, агьали щаллу буллайнма бур маскардал ва дезинфекция дайсса раствордал. Дуки-хIачIиялул багьригу, иширах бурувгун, личIину лахъ къавхьунни.
Шихсса агьалинал хъунмурчIинсса доходру дур туризмалия хъанахъисса. Ва ххуллух миллионну инсантурал ливчIунни давуртту дакъа. Жун, Европанал хIукуматирттай кунма, ичIува бацIаншиврул 1000 доллар зуруй буллай бакъар.
ХIакьинусса кьини Таиландрай коронавирусрал къашавай хьунни 2613 инсан, оьрмурдацIа хьунни 41 инсан ва 1405 инсан хъин хьунни. Уттигу ца бази бакъар карантиндалул дазу рищаврингу. Нагу 6, 10, 12 шинавусса шанма оьрчIащал бура шаппа щябивкIун. Вай шамагу занай буссия школалийн.
Таиландрай ялапар хъанай ттул хьунни кьунния лирчусса шинну. На дахьва шиккун бувкIсса чIумал, зий буссияв Бангкок-Паттайя тIисса госпиталданий таржумачину. Яла чIал къавхьуну тIиртIуссия нава заллусса турист фирма. Шикку чIявусса бур курортру ва мунияту хIат-хIисав дакъасса туристъталгу букIлай бур. Шикку бур багьлул ххирасса чартту ва арцу-мусил чIюлушиннарду дусса хъунисса машлул центрду, фабрикартту.
Шихун бивзун махъ, гъира багьну, багьлул ххирасса чартту ахттар байсса (геммологический ) курсругу бувккуну, шиккусса ца машлул центрданий тIивтIуссия арцу-мусил чIюлушиндарал ттучан.
Жула цIуллушивугу жула кIунттихьхьун ларсун, хIарачат банну шаппа бацIан. Жува цIанакул кувннан кув ххал къахъанарчангу, телефон, интернетрал кумаграйхчIин ца дунияллул зумания цамунийн оьвчин, хавар-махъ бусан бюхълай бур. ЧIарах дуккантIиссар вай захIматсса чIуннугу. Мунияту, жува ва ххуллух хъинну жаваблувну бикIан аьркинссару.
