Талатавурттал майданная кунна, гьарца кьини дукIлай дур сводкарду, гьарца кьини даххана хъанай дур коронавирусрал къашавай хьуминнал, ливтIуминнал ккал. Амма жунма,

та бухьурчагу, личIи-личIисса кIанттурдай ялапар хъанахъисса гъанчуная, дустурая цал ххишалану бавну ччан бикIай тикку хъана­хъимуния. Лакрал райондалийсса Шахьуйннал шяравасса инсанталгу кIама бивщуну бур щаллагу дунияллийх. Миннавасса ца­ппараннащал хьунни ттул цинявннал зума-ккарччулусса тагьарданиясса ихтилатгу.

---

Бадрижамал Аьлиева
[dropcap]И[/dropcap]зраилнаву, Хайфа шагьрулий, цикссагу шиннардий ялапар хъанахъисса МахIаммадова Марина МахIаммадссаламлул душ буслай бур:
— Цайми кIанттурдай кунна, Израилнавугу гьарца кьини даххана хъанай дур коронавирусрацIун дархIусса сурат. Жугу буру карантиндалул режимрай. Израилнал агьали цивппава закондалийну къуццу тIутIисса, мукъух вичIи дишайсса инсантал бур. Амма вирусрацIун дархIусса щалла статистикагу, тагьаргу зия дуллай бур цанма ччи-ччимур буллалисса, тIутIимуних вичIи къадихьлахьи­сса «диндалул агьулданул». Мукун бунагума, дунияллул билаятирттал дянив Израилнаву бур къашавай хьуминнал ва ливтIуминнал яла лагьмур процент.
Шагьрулувух цалва машинар­ттай занан уттигъаннунин бучIину бия.

Гьарца 15 минутIравун ца занай бивкIсса рейсовый автобусру 30, 40 ва 60 минутIравун ца занази бувну бия. ЦIана тIурча, карантиндалул тагьар хъиннура гужлан дуллай бур, дяхтта ссят 3 хьуну, хъиривмур кьинилул кIюрххил ссят 8 хьуннин къатлучIату 100 мет­ралияр тинай я ахьтта, я машиналий уккан­сса къадагъа дуллай бур, транспорт дацIан дуллай бур. Шагьрурдал дянивми рейсру цинярдагу дацIан дурну дур.

ЦIана хIасул хьусса тагьардануву маска дикIан аьркинссар гьарцагу инсаннай, му ду-дакъашиврул бусласиссар инсаннал культуралия: агарда вий маска духьурча, вин къаччиссар цама инсаннан зарал хьуну, вила дакIниву, вилла начлий ттангъа хьуну. Шаппа щябикIира тIий бурив, щябикIира.
Израилнаву карантин баян бувну хъиривмур кьини циняв бувккун бия, аьдатсса куццуй, паркирдавун. БувчIин бувна му кьини агьалинан скамейкардай, микку-тикку лирчIмунийн бувну коронавирусрал къашавай хьунсса нигь хъуннашиву. Къурталли, бувчIунни цинявннан – хъиривмур кьини паркирдаву рухI дакъая.

Давурттая тIурчан, зун бучIи­ссар так манзилданий (цIана халкьуннаву учайсса куццуй, «по удаленке»), мукун зий бур билаятрал агьалинал 30 процент. На нава чIярусса шиннардий зий бура оьрчIах буруглай, нянкану, ца кулпатраву. Му оьрчIал нину-ппугу цIана зий бур шаппа, нину, мисалдаран, дур психолог, цилва клиентътуращал скайправух, телефондалувух гъалгъа тIий, шардара даву дуллай. Миннал биян бувара на даврийнгу, махъунмай шаппайнгу. Амма, ми цивппа заллусса машиналий занай бунугу, на лажиндарая маска, канива спиртравун щусса салфетка чан хьун къабикIара, мудан муних кару лихьлайна бикIара шаппайн бияннингу, даврийн найнигу, къатлул нуз тIитIлайнигу, мунил кайму салфеткалух дакъа къадугьара.

Ттул лас зий ур Хайфа шагьрулийсса азарханалий электрикну.
Израилнаву инсан коронавирусрал увгьуну ушиву-акъашиву кIул бувай 40-45 минутIрал дянив.
Щаллара дунияллийсса тагьарданух бурувгун учин, бакIрайва, дахьра вирус сукку хъанахъи­сса чIумал, Китайнал халкь цукун, ци зун аьркинссарив къакIулну бивкIхьурча, утти жунма кIулли ци дуллан, цукун къуццу тIун аьркин­ссарив, кIулли жува буруччаву жула кIунттихь душиву.
Израилнал чIявуми инсантурал цIана эбрат Японная ласлай бур: марцIшиву, цал ялагу марцIшиву.

ЦIанасса чIумал хъатIайн, кувнначIан кув хъамалу заназаву ккаллийссар къачагъшиврун, яла пикри бакъа кьамул бувмур хIукмулун, зула гъан-маччаминнан буванна тIий бувсса оьбалалун.
ХIакьинусса кьини (7-мур апрельданул кьини) Израильнаву коронавирусрал увгьусса 900 инсан ур, 59 ивкIусса ур. Вай цифрардугу вайннуяр цукссагу лагьсса бикIантIиссия, «диндалул агьлу» багьайкун къуццу тIий бивкIссания.

[dropcap]В[/dropcap]ай гьантрай Японнал жун кумагран гьан бувну бур, цалсса тестирование хIисаврай, коронавирус хъин дуван ишла бувайсса цIусса препарат («Авиган»). Му препарат ххал бувантIиссар билаятрал кIива азарханалийсса 80 къашайшалай.
Дагъусттаннай ттул угьарасса ппу, уссу, махъсса гъан-маччами, дустал буссар, Подмосковьелив ттул ца бакъа бакъасса душ, душнил оьрчIру буссар. Цинявннащал муданнасса дахIаврий бура, гьарцаннал буруккинттарай бура. Чув ухьурчагу, гьарцама Хъунасса Заннал уруччиннав, бурувччуну битаннав ттул аьзизсса Дагъусттан. Хъинмур чивчуну лякъиннав.

Аьлиев Михаил Ризваннул арс, Украина, шагьру Харьков:
— Жугу буру карантиндалул тагьарданий. Цимурца ларкьуну дур, так инсаннал оьрмулун чара бакъа аьркинмур личIаннин. Дазурду ларкьуну дур, шагьрулувух занай дур так инсантал цив­ппа заллусса транспорт. Жу ялапар хъанай буру шагьрулул зума-къирагърай. ТIайламур бусан, коронавирусрацIун бавхIуну, билаятрай, дунияллий хъанахъимунил хъирив хъинну лаянмургу къабулларду. Бюхъавай кьатIув къабукканмур бувару, так чара бакъул буккарча бакъа. Ттун кIулссаксса, Харьковрай му азарданул бувгьу­сса бакъар, инсантурал дянив авара бакъар, паракьатшиву дур. Шагьрулул кIичIирттал, къатрал подъездирттал дезинфекция дуллай бур, гьарцама маскардаву занай ур, гьар кIанай инсаннал чурххал температура ххал дуллай бур.
Жу ялапар хъанай буру частный секторданий, шикку хIаятраву, ахъу­ву дулланмур чансса дакъар. Лагмара – я батIин къашайсса караматсса тIабиаьт – вацIа, бяр.