Ца ацIра шинал хьхьичIва ттухьва щилчIав увку­ссания, щалла дунияллийцири агьлу, кувннахьхьун кув кару дулун къахъанай,ссалам булун къабучIиссар тIий,

шаппа-шаппа щябивкIсса чIунну дучIантIиссар куну, бюхъай­ссияв на мукун тIутIиманах авдалнах кунма бурган.

Ца ацIра шинал хьхьичI мукунма ттухьва щилчIав увкуссания, инсантал ттучанная дуки-хIачIия хъямала дуллантIиссар кунугу, бюхъайссияв шаттирал бакIрах супермаркетру бур, даххултрал складру бувцIуну бур, хъямалашинна дуллан дяъвигу бакъар, ккашигу бакъар, вагу ци варсагъру буслай ур тIун. Амма та нюжмардий ттучаннайн гьужум бувссаксса иш бивкIунни шагьрулуву.

Ца имбирь 1800 къурушран ккилорахлуну дахлахисса кIанттугума хьунни. Къулкрал зумуну гьарзат ичIуннай ххилай бивкIунни. Гьунттий ккаши багьан най бусса кунма. Ца чулуха, мукунминнай аьй дуллан ци ишри ттул, цалла арцух цанна ччимур ласлай бур! Учарухха, «бивщунал бя, кьуркьунал тIама!» куну. Амма кьурчIи бивзунни даххулт багьри гьаз буллай булукьаву, кIул бакъа бала ялун бивсса, агьалинавун ццахханну дагьсса ппурттуву чIярусса арцу лякъин ччисса инсантал тамансса бувкшиву. Укунсса иман дакъашивруву личIинува бусрав-барчаллагьрансса даву дуллай бивкIунни ва дуллайнма бур «Инт» кафелул хъунмур Саидат Кьурбанова. Ванил мудангу цивппалусса, ургала акъасса къари- къужрачIангу, мушакъатминначIангу, чIявусса оьрчIру бусса кулпатирттавунгу тIайла дуккайссар нахIура-нахIусса дукра. Мудангу. Къалахьхьу-хIакьину.

[dropcap]В[/dropcap]ай гьантрай, тIурчарив, Саидатлул мукунсса ссай­гъатру чIяву бунни. Амма ванин къаххирар дурсса хъиншивурттая гъалгъа тIун. «Дуваймур, дунияллун баян буванну къадуллай, ашкара къахьуннур дуван аьркинсса», — учай Саидатлул.

Кафелул зузалт сайки циняв ттун кIулсса бур, вайннаву жул шяравассагу бур, вайннан кIулссар Саидат кьини дуркнал чIарав цукун бацIайссарив ва хIакьинусса кьинигу цукун сахаватну бугьараминнан ва мюхтажминнан дуканмур тIайла дуклай буссарив. Ва ялагу, циванни маскардал дефицит тIий, циняв гьуя- гьарай тIий бунува, щябивкIун янна дуруххай машиналух, Саидал циняв зузалтрансса, чIаххуврайсса ттучаннайсса даххултранссагума, маскарду цилла дурурххунни. Бухху-букку бунутIий, лагма-ялттусса даххултрая тIалав бунни маскарду лаххаву.

На социал пострай (вай гьантрай на социл сетирдайсса ттулва блограй, къанихшиврул ва оьшиврул оьван чичлай бивкIра хъиншиврия-хъинбалдарая, нава увкусса куццуй, хъинбалдарал «азар-пандемиялия») яъни укунсса уздансса тIуллая чичайхту, ттун кIула Саидат ттуйнма дяъвантIишиву, чичругу лиххан дува тIунтIишиву. На къабував мунил тIимур. Ялунгума, чичлай бура кказитрайнгу. Укунминная лахьхьин аьркинни жунма хъиншиву дуван. ХIакьину жунна аьркинмургу, диял къахъана­хъимургу хъиншиву дур, ччал буварча, хъиншиву дуваврил ччал буван багьлагьисса замана бур. Ва суратрай, къакIулнангу кIул хьун, щябивкIмурди Саидат. Ванил махъ бавцIуми язисса лакку душру – София Разуева ва Асият Буттаева. Шанмагу Мариян Илиясовал цIанийсса «Дара­ччи» фондрал аьнтIикIахъулли. Ва ца суратрай цуксса хъиншиву асар хъанай дурив бургияра, муниятура ттунна итталун дагьсса ва сурат, зулгу ябацIаншиврий дакI дарцIуну, зул хьхьичIунгу ласласисса. Цал уттигу, дуниял ххассал дувантIиссагу хъиншиврулли! Так хъиншиврул!

ПатIимат Рамазанова