[dropcap]А[/dropcap]прельданул 15-нний Аьрасатнал Президент Владимир Путиннул тIайланнасса эфирданий Аьрасатнал ХIукуматрал члентуращалсса батIаврий
бувсунни коронавирусрал инфекция ппив шаврил тагьардануцIун бавхIусса антикризисрал чараннал цIусса пакетрал хIакъираву.
[dropcap]П[/dropcap]резидентнал тапшур бунни щаллу дуван яла хъунмур щавщи бивми зузи идарарттал сияхI. Ми хъанай бур чIявучин къадукиялулмур хъус машай дуккан дуллалисса чIиримур ва дянивмур бизнесрал идарартту, компанияртту.
Микку ккаккан бувну бур, хьхьичIва ккаккан бувсса кумаграяр ххишала, паччахIлугърал чулухасса тIайланмасса занабиту къабайсса (безвозмездная) кумаг. Ми арцу зузи идарарттаща ишла дуван бюхъантIий бур зузалтран харжру булун гьашину апрельданий ва майрай.
ТIайла бацIан бавуртту дуллай бур «харжирдансса кредитирттал» бутIувугу, миннуя лахъаву даврил процентру къаласун ккаккан бувну бур («зарплатные кредиты» под нулевой процент).
[dropcap]П[/dropcap]утиннул тIимунийну, хIакьину банкру муния махъаллил хъанай бур. Мунийн бувну хIукму хьуну бур мукунсса кредитру цIакь дуван 75% ВТБ-лул гарантиярттал. Мунийну бюхълай бур кредитрал луртанну сивсуну ишла дуллан ва банкирдан дулунтIий дур ххишаласса гарантияртту.
Мукунма хIукуматрайн тапшур бувну бур цIудуккан дуван системарду хьун дуллалисса зузи идарарттал сияхI. Му сияхIрайн ласун аьркинну бур национал экономикалун хъуннасса агьамшиву дусса идарартту. ЦIанасса ппурттуву му сияхIрай бусса бур 1000-нния ливчусса хъунисса идарартту, ми хъанай бусса бур билаятрал экономикалул гьануну.
[dropcap]П[/dropcap]резидентнал бувсунни уттигу регионнангу бувантIишиву арцуйнусса кумаг, миннул доходругу чан хъанай дунутIий. Мунал тапшур бунни тIайла дуккан 200 млрд. къуруш регионал бюджетирттан кумагран. «Бюхъайссар уттигу цIусса хIукмурду аьркин багьан, аьмну экономикалулгу, личIи-личIину отраслирдалгу хIакъираву. Мукунсса хIукмурду цIанава хIадур буллан аьркинссар», — увкунни Владимир Путиннул.
