[dropcap]З[/dropcap]ахIматсса тагьар ялун дирукун, жула халкь кувннал чIарав кув бацIайсса бушиву цал ттигу исват хьунни, коронавирусрал инфекция сукку хьуну,

чIявусса инсантураща кьатIув буккан къахъанахъисса чIумал.

Чирилул акцияртту дурунни республикалийсса цинярдагу ихIсандалул фондирттал. Ххаллилсса давуртту дунни ва уттигу дуллай бур Лакрал жагьилтурал ккурандалучIасса «ЦачIуну бюхъантIиссар» тIисса ихIсандалул фондралгу.
Жул ихтилат хьунни ккурандалул бакIчи Давуд Амировлущал.

— Давуд, та, цукун сакин хьуссар зул ккуран? Циксса инсантал бур хIакьину муниву? Цукунсса бур зул агьамми мурадру?
— Жул ккуран сакин хьуссар 2016-ку шинал. Тани Дагъусттаннал бакIчи Р.АьбдуллатIипов ия жагьилтурал организациярду дувара тIий. Жугу дурссия Лакрал жагьилтурал ккуран, шаннагу жула райондалий зунсса пикрилий. ЦIана шаннагу райондалий буссар жул вакилтал. Ккурандалуву чIявусса инсантал буссар, амма чялишну зузисса ца мукьцIалаксса инсан ур. 2020-ку шинал дуллансса давурттал программа дуссар хIадур дурну.

-Муниннин ина ссаха зий уссияв? КутIану виятувагу, зула ккурандалул дуллалисса давурттаягу бусарча, ччива.
— На увну , хъуна хьуну ура ЦIуссалакрал шяраву.Ттул ппу АбутIалиб Щардал шяравасса ур, нину Узлипат –ТтурчIиясса. Увну ура 1983-ку шинал. Къуртал бувссар Къизлардал электромеханикалул колледж. Мунияр махъ ларсъссар юридий ва теологиялул кIулшивуртту. Къуртал був­ссар мукунма Дагъусттаннал педуниверситетрал физкультуралул факультет. Зий уссияв тренерну. Яла, ттула дустуращалгу маслихIат ккав­ккун, жула инсантурангу кумаг хъанан­ссар тIисса пикрилий, хьуна ва ккуран сакин дан. Уттинин ккурандалул дурсса циняв давурттая къабусланна, кIицI лаган ччива, жул ккурандалул сипталий ва сакиншиннарай хьушиву лакку мазрай шеърирду буккаврил конкурс ва мунил хIасиллу дуллалисса февраль зуруй хьусса ххаллилсса лакку мазрал байран. Новостройрал трестрай дур­ссия Дагъусттаннал тарихран ва му тарихраву яргсса лажин чирчусса Сурхайханнун хас дурсса мероприятие. Ва цIана коронавирусрал инфекция сукку шаврицIун бавхIуну бакъассагу, жу хьхьичIрагу дуллай буссияв чирилул акцияртту. «Ятинтурал ххаришиву» («Радость сирот») тIиссагу щалагу республикалий дайсса занази акция дуссар. Му жул ккурандалул сипталий дайдирхьусса акцияр. ДукIу 1500 инсан хIала увххуна мунивун.

— Ва цIанасса захIматсса тагьарданийгу зу инсантуран ххуйсса кумагру бунни, чIарав бавцIунну. Утти­нин цими инсанначIан биян бювхъур зуща?
— Апрель зуруя байбивхьуну гьарица кьини занай буссару шагьрулул цинярдагу районнайх дуки-хIачIия дусса кьуцуртту биян буллай мюхтажсса инсантурачIан. Итни кьини 30 кьуцури гьан барду Буйнакскалийн, микссава Хасаврайн. Гьарца кьуцурттуву дирхьу­ссар 600 къурушрансса сурсат. Ми дакъассагу накI-нисирал продукция: накI, барт,тартнакI,йогурт, сырок. ХхюцIа-ххюцIалва кьуцури лавсун лавгру Лакрал ва Ккуллал районнайн. Мюхтажнайх бачIин администрациярдай кьабитару. Утти ЦIуссалакрал районналийнгу гьантIиссару. ХIакьинусса кьининин- апрель зурул 16-ннийн бияннин 450 кулпатран кумаг бувну бур ккурандалул. Уттигу 200 инсан ур кумаг бара тIий жуйн бувксса, ялун ххи къахьурча.

— Зула чIарав бавцIусса, кумаг бувсса щил цIарду кIицI давияв?
— КIицI лагавияв жува буллалисса акциялувух хIала бувхсса «Даг Трейд Компани» тIисса накI-нисирал продукция итадакьлакьисса жула лакрал-чIяйннал идара. Кьуцурттаву дирхьусса накI-нисирал продукция миччассар.Хъунмасса барчаллагь учин ччива ва идаралул хъунама ХIажикьурбан АьвдурахIмановлухь. Мукунна цала чулуха кумаг буллай хIала ув­ххунни Кировский райондалул администрациялул бакIчи СалихI Cагидов. ХхюцIала кулпат ванал цала бакIрайн лавсунни.

— Кумаг бара тIисса инсантал мяйжаннугу мюхтаж­сса бурив? Цукун кIул бару зу ми?
— Жу кумаг бувсса 70-80% инсантурал хIакъираву жучIан оьвкунни миннал багьу-бизу кIулсса,чIалачIисса чIахху-чIа­рахнал, гъан-маччанал. Оьвкунахь цIухху-бусу жувагу барду. ЛичIи-личIисса инсантал хьунабакьай. Бур 80 шин хьусса пенсионертал, миннал 20 азарда къуруш пенсиялул дур. Бур, жагьилнугу, миннаяр оьккину ливчIсса, я пенсия, я харж бакъасса. Бур ласурваврал кьабивтсса, муданна­сса даву да­къасса, чачIав кумаг бакъасса хъами. Бур, арцу дакъа, ттучандалия буржирай ласлай, буржру лахъан къахъанахъи­сса. Жу хъунмурчIин укунсса инсантуран кумаг бару. ТIайламур бусан, жула районная жуйн цаягу инсаннал къаоьвкунни. Лакрал ккуран духьувкун, лак­рал районнайн къабувкIунни къаучин лавгру.

— Кумагру буллалисса инсантурал суратру ласлай, соцсетирдаву ппив циван дуллалиссар тIий рязи бакъассагу бур. Ци учинна мунил хIакъираву?
— Жу царагу сурат къарищай­ссар, къаласайссар инсаннал цала пурман къабуллуну. Жула акциярду ккаккан буллай буру хIала ­уххан, кумаг бан ччисса ухьурчагу ягу жула кумаг аьркинсса ухьурчагу тIий. Жуйнма оьвтIисса инсантурахь учин ччива, балики телефон гьаз дуллай бакъахьурча, цахъи ссавур дувара. Сант шайхту жу жува оьвчинну зуйн. Горячая линиялул телефон: 89887816030 Давуд Амиров. Акциялувух хIала увххун кумаг бан ччисса ухьурча, арцу дичин бюхъантIиссар ва номердануцIун цIакь дурсса Сбербанкрал карталийн. Жу гьарица кIапIикIрал отчет дулунтIиссар.

— Коронавирусрал ин­фекциялуцIун дархIусса карантиндалува був­ккун махъ ссаха зунсса пикри бур?
— ХIукуматрал грантрайн дулун ччай буру жула проект. Микку ххув хьурча, жуща бюхъанссия ва шин къуртал хьуннин, харжирай инсанталгу щябивтун, дуллан жула даву. «Горячая линиялий» кIия инсан щяитан аьркинни. КIиявагу инсан аьркинни оьвкуначIан тагьар ххал дан, цIухху-бусу бан гьансса. Бур цаймигу щаллу бан багьлагьисса масъалартту.

— Ихтилат къуртал буллай, ци учин ччива жула инсантурахь?
— Мабукларду кьатIув, карантин буссаксса хIаллай. Мюхчан хьияра нигьачIаву дусса азарунния. Дуруччияра зулагу, зуламинналгу цIуллушиву!
— Барчаллагь, Давуд! Ина дуллалимуницIун Занналгу кабакьиннав, дакIниймур бартлаганнав.

Ихтилат бувссар
Андриана Аьбдуллаевал