Камил ЦунтIаевлул вебинар

Камил ЦунтIаев

Ларгсса нюжмардий, апрельданул 15-нний, онлайн-режимрай, «Архитекторы.рф» программалул лагрулий хьунни жагьилсса архитектор,

лакку оьрчI Камил ЦунтIаевлул вебинар. Му хьунни «Зунттал шяраваллал ляличIишиву: хъиривлаявуртту ва практика» тIисса цIанилу.


Бадрижамал Аьлиева
БакIрайва кIицI лаган, ванияр кIира шинал хьхьичI, 2018-ку шинал, Камил гьуртту хьуссар «Архитекторы.рф» программалул марафондалий. Му программалул хIасиллайн бувну Камил ЦунтIаевлул цIа дагьссар «Аьра­сатнал язисса ттурша архитекторнал» сияхIрайн.
Увну ур Камил МахIачкъа­лалив НицIавкIра­тусса Абуияпсиннул ва Хъювхъатусса Заирал кулпатраву. ОьрчIшиву ларгун дур ЦIуссалакрал шяраву ва Къурхъмаскъалалий. Цалчинмур классгу ЦIуссалакрал шяраваллил школалий бувккуну, гихуннайсса дуккаву дурну дур МахIачкъала шагьрулул школардай.

Камил ЦунтIаевлул дурсса «Пери» кIулшиву дулаврил центрданул проект,
ш. МахIачкъала

МарцIсса ххювардай був­ккуну бур Художествалул школа. 2003-ку шинал Москавлив увххун ур ПаччахIлугърал Землеустройствалул университетрал архитектуралул факультетрайн. Дуклайгу унува, зий ивкIун ур STRABAG тIисса строительный организациялий, буллай ивкIун ур «Москва» тIисса патирхана. Дуккаву къуртал дурну махъ зий ивкIун ур Москавлив Роман Леонидовлул архитектуралул бюрорай архитекторнал кумагчину, «Сатубалов и Партнеры» архитектуралул бюрорай. 2010-2015-ку шиннардий Камил зий ивкIссар МахIачкъала шагьрулул Архитектуралул управлениялий генерал пландалул отделданий хъунама специалистну. 2015-ку шиная шинай Камил ур SKTS (ООО «Студия Камиль Цунтаев») архитектуралул бюрорал директорну.
Ва кьинисса вебинарданувух гьуртту хъанахъиминнахь Камиллул бувсуна ттизаманнул ва хьхьичIарасса архитектуралия, Дарбантуллал ялунмайсса иширттая, ттизаманнул проектированиялия.

– Яла-яларив, сивсуну буллан аьркинссар цIу-цIусса экспериментру ва чара бакъа махъунмай, жула лавгмунихгу буруглан аьркинссар, — тIий ур Камил.
Апрельданул 6-нния шиннай дайдирхьуну, июньдалийн дияннин дуллантIиссар «Архитекторы.рф» сообществалул гьурттучитурансса ва члентурансса вебинарду, лекцияртту, цинярдагу – 9 нюжмардийсса 9 тема ххал дигьинтIиссар. Гьарца нюжмар хас дуллалиссар ца проектрал группалул темалун.
Итникьинирдай хьхьичIунсса экспертътурал буллалиссар онлайн-лекцияртту, нюжмар ва ххуллункьинирдай – группардайсса конференцияртту.
АлхIаткьинирдай, «тIивтIусса микрофондалул» журалий, гьурттучитал ва выпускниктал махъсса финалистътурал хьхьичIун буклакиссар цалла язи дургьусса темалущал.

Гьарцагу арвахIкьини тIурча, ахттайннай ссят 12.00 хьуну, программалул гьурттучитурал ва выпускниктурал буллали­ссар тIивтIусса, чIяву инсанталгу гьурттусса вебинарду.
Вай цимурцаннух буруган бюхъантIиссар «Архитекторы.рф» программалул соцсетирдай.
«Архитекторы. рф» щаллу дуллалиссар «Стрелка» тIисса институтращал уртакьну, АьФ-лул ХIукуматрал ва Строительствалул министерствалул кабакьулийну.