[dropcap]М[/dropcap]ахъ ппурттуву коронавирусрацIун дархIуну хIасул хьусса тагьар сававну, аьркинний кьатIушав буккан къахъанай, вас-ццахлий ливчIунни инсантал, хаснува оьрмулул бугьарами.

Ва тагьар сававну укунмавагу къабигьану бивкIсса инсантуран къайгъурду, буруккинну ххи хьунни. Мукунминнан кумагрансса цащара шайсса давуртту, акцияртту дуллай бур личIи-личIисса фондирттал. Миннувух – «Шахьуйми» фондгу.

---

Бадрижамал Аьлиева
[dropcap]В[/dropcap]а фондрал жагьилтурал сипталийну вай гьантрай Ма­хIачкъала шагьрулий ялапар хъанахъисса Шахьуйннал шяравасса арулва кулпатравун бивунни дуки-хIачIиялул сурсатирттащалсса къуршив. Жагьилтурал дуллалисса даврил чIарав бавцIуну, шайманал шайссаксса шагьи буллуну, ка кIидахIин дунни шяраваллил инсантуралгу.

Цала чIарав бавцIуминнахьгу дакIнийхтунусса барчаллагь тIий, Шахьуйннал шяраваллил жагьилталгу бур, шаппа щя­бикIияра, зулагу, зулва ичIу­ваминналгу цIуллушиву дуру­ччияра, мугъаятну бикIияра, лагма-ялтту бурувгун, захIматсса тагьарунниву ливчIминнан зущава шайсса кумаг бувара тIисса оьвчаву дуллай.
Кьамулсса цадакьа хьуннав, зу бувмур чирину бацIаннав!