[dropcap]У[/dropcap]ттигъанну на хьунаавкьуссияв Ккуллал райондалул финотделданул каялувчи, Мяъсудлул арс Кьурбан Амучиевлущал. Жул дянив хьуна чIиви-хъунсса ихтилат.
— Кьурбан, райондалул бюджет цукун хIасул шайссар?
— Ккуллал райондалул бюджет хIасул хьуну буссар жула райондалул вив дучIан дуван бюхъайсса арцуя ва Дагъусттан Республикалул дулайсса арцуя. Гьашинусса 2020-ку шиналсса Ккуллал райондалул бюджет бур 299 миллион ва 764 азарда къуруш.
Вайннувату ккаккан дурну дур 38 миллион ва 784 азарда къуруш жула райондалул вивату датIин аьркиншиву. Райондалий дур 12 кIанттул сакиншинна, цавунгу духлахисса 14 шяравалу. Вайнна вай кIанттул сакиншиннардал дулун аьркинсса налогрур ялув кIицI дурсса арцу. Вайнуйн оьрус мазрай «собственные доходы» куну учайссар. Вай жура дулун аьркинсса налогирттавун духлахиссар райондалийсса ишбажаранчитурал, ттучанчитурал ва цува заллусса ятту-гъаттарал пирма думиннал дулайсса налогругу.
— Ларгсса шинал райондалий най дия ххуйсса строительствалул давуртту. Миннул иш-тагьар цукунссар?
— ДукIу буллай байбивхьуну, октябрь зурул дязаннив къуртал бувссар Хъуннеххайхсса Хъюйннал ламу. Мукунма ганиннин буллай бивкIсса Ваччату Ккул-Хъусрал чулийнмай нанисса ххуллийсса ламугу дузал бувссар. Райондалийсса давурттаву янилун дагьссану хьунни Вихьуллал ва Хъусращиял шяраваллаву бувсса паркру. КIилчинмур дачIишинаяр махъ байбивхьуну, дуллай дурссар Щуну-Зунттуяту Къянив, Хъюйн, ЧIяв, Ваччав щин дурцусса давурттугу.
[dropcap]В[/dropcap]ай давурттугу кув бюджетравун духлахисса, кувгу республикалул программарттай дуллалисса давурттуну хьуссар. Шиккува кIицI бан ччива кIира шинал хьхьичI райондалул хъунаману увчIусса Рамазанов Шамиллул хIарачат бувшиву вай ялув кIицI ларгсса давурттансса харж-хурж тIалав бан. Умуд бур вания тихунмайгу жула райондалул ахIвал-хIал ххуй хъананссар тIисса.
— Барчаллагь, Кьурбан, гъалгъа кутIасса бухьурчагу, суаллахьхьун дуллусса жавабирттахлу.
