[dropcap]Ш[/dropcap]иная шинайн ххялтIа дуклай дур Бюхттулсса Ххувшаву ларсминнал кьюкьри. Дяъвилия зана хьун кьисмат хьурчагу, щавурду къадирсса вайннаву нажагьссавагу бакъахьунссия.
Дяъвилия зана хьуну махъгу дяъвилул ппив дурмур ччаннай дацIан дуллай вайннал бивхьусса захIматран багьа бищун къашайссар. Укунсса вирттаврал цIарду дакIний ритан ва хъирив нанисса никирахь вайнная буслан жула, хъуниминнал, буржри. ХIакьину ттун бусан ччива ТтурчIиял шяравасса Сулайманнул арс Багьауттин Сулаймановлуя.
Андриана Аьбдуллаева
[dropcap]В[/dropcap]а увну ур ТтурчIиял шяраву 1912-ку шинал. Грознайлив навтлил институтрачIасса рабфакгу къуртал бувну, Багьауттин увххун ур институтравун, амма гужну къашавай хьуну, институтгу кьабивтун, шавай зана хьун багьну ур. Шяравугу хъунмасса хIаллай къашавайгу ивкIун, хъин хьуну махъ лавгун ур Узбакисттаннавун цала маэшатрал хъирив. Зий ивкIун ур Андижан шагьрулий учительну.
Тичча увцуну ур аьралуннаву къуллугъ бан. Ва армиялий уна байбивхьуну бур Хъунмасса Буттал кIанттул цIанийсса дяъви, Багьауттингу, Харьковрайсса аьрали училищалуву анаварсса, шанма зуруйсса, курсругу бувккуну, тихава аьрайн гьан увну ур. Ва талай ивкIун ур 33-мур аьралуннал 222-мур битултрал дивизиялул 774-мур полкраву. Гьуртту хьуну ур Цалчинмур ва Шамилчинмур Белоруссиянал фронтирттайсса къизгъинсса талатавурттаву.
КIийлла захIматсса щаву дирну, хирургиялул полевой подвижной госпитальданийн (ХППГ) агьну ур.
Талатавурттаву ливтIусса ва бивщусса хIаписартурая штабрайн баян буллалисса сияхIраву дур Багьауттиннул цIагу.
1941-ку шиная 1946-ку шинайн бияннин ванал бивтун бур лахъисса дяъвилул ххуллу. Берлиннай ва ца райондалул комендантну ивкIун ур. Дяъвилий талай ккаккан дурсса къучагъшивурттахлу ва лайкь хьуну ур кIира ЯтIул ЦIукул ордендалун, 1-мур ва 2-мур даражалул Буттал кIанттул цIанийсса дяъвилул орденнан, «За взятие Берлина», «За освобождение Варшавы», «За победу над Германией» ва цаймигу медаллан. Немецнащалсса дяъви къуртал хьуну махъ Багьауттин гьан увну ур Дальний Востокрайн Японнащалсса дяъвилийн, амма ва тихун ияйхту дяъви къуртал хьуну бур. 1946-ку шинал зана хьуну ур. Му чIумал ТтурчIиял агьлу Аухуллал райондалийн бизан бувну бивкIссар.
[dropcap]В[/dropcap]агу цаламинначIан ЦIуссалакрал шяравун увкIун, шийх кулпат бувну бур. Дяъвилия махъсса шиннардий Багьауттин зий ивкIун ур личIи-личIисса жаваблувсса къуллугъирттай: ЦIуссалакрал райондалул партиялул райкомрал II секретарьну, райисполкомрал председательну, колхозрал председательну, ЦIуссалакрал ва Казбековуллал районнал цачIусса шяраваллил хозяйствалул управлениялул «Межколхозстрой» ПМК-лул каялувчину. Хъуннасса даву дурссар Багьауттиннул тай захIматсса дяъвилия махъсса шиннардий дахьра сакин хьусса ЦIуссалакрал район ччаннай дацIан дуллай. Ва захIматрахлугу Багьауттин лайкь хьуссар личIи-личIисса наградарттан. Багьауттин дунияллия лавгун ур 1987 шинал.
[dropcap]Б[/dropcap]агьауттиннулгу, ванал кулпат Бадрижатлулгу бур шанма оьрчI. Хъунама арс Симардин, ванал цала тIийкун, оьрмулухунсса нефтяник ур. Грозналийсса Навтлил институтгу къуртал бувну, гиккува зий ивкIун ур техникалул отделданул инженерну, яла «Дагнефть» организациялий буровой давурттал управлениялул, навт ва газ буккайсса управлениялул хъунаманал хъиривчуну. ХIакьинусса кьинигу шикку зий ур. КIилчинма арс МахIаммад зий ивкIун ур Невинномыск шагьрулий судрал органнай, ва ур II-мур даражалул ПаччахIлугърал юстициялул советник.
[dropcap]П[/dropcap]одполковникнал чиндалуву отставкалийн увккун, тихва ялапар хъанай ивкIун ур. Ца-кIира шинал хьхьичI аьпалухьхьун лавгун ур. Душнил Маликал къуртал бувну бур Дагъусттаннал педуниверситетрал чил билаятирттал мазурдил факультет. Сайки 30 шинай ингилис мазрал дарсру дихьлай бивкIун бур Хасавюртуллал 13-мур школалий. Мунияр махъ – Хасавюртуллал агроколледжраву.
Багьауттиннул оьрчIру, цува кунма, хIарачат, бюхъу-бажар бусса, жяматран бусравсса инсантал бур. Дяъвилул цIараву савсъсса Багьауттиннул цамур куццуй тарбия бангу къабюхъайва цала наслу.
