Диана Узалова, Саоьдуллал Аьрабнаву ялапар хъанахъи­сса:

-Жугу тамансса азур­да хьунну, коронавирусрацIун дархIусса тагьар сававну.
ВирусрацIун дархIусса тагьар оьлукъин хьхьичI гьант­рай Саоьдуллал Аьрабнава жу Ираннавун лавгссияв. Муниннин Стамбуллай паракьатшиву дия, цукунчIавсса вирусрая нигьа бувсъсса тагьар дакъая. Жу Тегераннайн бивну шанма гьантта шайхту, сукку хьунни коронавирусрацIун бавхIусса аваза.

[dropcap]Б[/dropcap]авунни шиитътурал мубараксса Кум тIисса шагьрулийн хIажлий увкIсса китайнал инсаннай вирус ляркъуну дур тIисса хавар. Исват хьунни му хавар тIайласса бушиву. Аваза гьаз хьуну, байбивхьунни лакьлай тарихийсса кIанттурду. Жул хъунмур нигьачIавугу дия жущалвасса кIивагу душния. Мукунсса тагьарданувун багьну ливчIунну жу тикку ацIвахъул гьантрай. Тур дия 8 гьантлий­сса, 2 гьанттагу хьунни жул гостиницалий чунчIав буккан къахъанай. Хъинну язугъсса тагьар дия Ираннаву. Та ппурттуву 500 инсан ия коронавирус лархъсса. Утти тIурчан, тикку къашавай хьуминнал сияхI лархъун дур 38 азара инсаннайн, ливтIуну бур 2600-хъул инсантал.

ЦIана Иран 6-мур хху­ттай бур коронавирусрал къашавайсса инсантал гьарзасса хIукуматирттаву. Бакъая карантин баян бувну. ДацIан дурну дия самолетирттал рейсру, ларкьуну дия сайки цинярда дазурду. Байбивхьуру махъунмайсса билетру ххал буллай. ЛивчIунну жува ялапар хъанахъисса Риядлив леххан къахъанай. Ва тагьардануву жуща леххан бюхълай бия так ца Москавлив. Дубайлийн лавсъсса билетру, ххишаласса арцугу дуллуну, баххана барду Москавливсса самолет­райн.

Тамансса инжитгу хьуну, ахиргу бивру жу Москавуллал аэропортрайн. Москавлив бияйхту, самолетрава итакъабакьлай, ялугьлагьи бувру таман­сса хIаллай. Яла бувкIунни авиапассажиртурал чурххал температура дуцлацисса бригада, муния махъ бавкьунну цIанихсса F терминалданувун. Шикку жу хьунабавкьунну «космический костюмирдавусса» хIакинтурал бригадалул. Ларсунни майрава ва кьакьарттува анализру. ДачIи ссят ларгунни ялагу справкар­тту, больничныйртту ва хасъсса маслихIатру бусса документру дузал хьуннин. ХIасил, американал блокбастерданувун багьссаксса иш бия.

[dropcap]Я[/dropcap]ла бувчIуна F-терминалданувун бакьай­сса бивкIшиву коронавирус душиврийн щак багьлагьисса пассажиртал. Цинярда ххал бигьавуртту дурну махъ жу итабавкьуру C, D терминалданувух кIира нюжмардийсса карантиндалийн. Та ппурттуву Ираннава увкIсса пассажирнаву вирус дусса цаягу инсан къалявкъуна. Амма бувчIлай бакъая, жул хъиривва Италиянава левххун букIлакIисса па­ссажиртал, жу кунма, хьунабакьлай, ялув бавцIуну ххал буллай бакъашиву.

Тичча жу кIира нюжмардийсса карантиндалийн тIайла бувккунну, ларсунни кIилла анализру. Аллагьнал кабакьаврийну, цIуллуну-сагъну ва аьр­ххилуща ххассал хьунну.
Бюхъайссаксса бурувччуну бикIияра. Аллагьнал зул дуаьр­тту кьамул даннав.

ХIадур бувссар
Имара Саидовал