[dropcap]Ш[/dropcap]ахьуйннал шяраватусса Нариман ва КIундиннал шяраватусса Аслибика, 1955 шинал ташулулгу хьуну, Къизилюртуллал шагьрулий миналул хьуну бур.

Аьпа бан цал, кIира шинал хьхьичI дунияллия лавгсса, цала захIматрайну узданну оьрму бувтсса Нариманнул цIа хIакьинугу ва шагьрулийсса хъунмур никирал агьулданул бусравну зумух ласай. Танисса чIявусса оьрчIал кунна, оьрчIшивурагу цирив къакIулну, Хъун дяъвилул шиннардий хъуни арамтурал кунмасса захIматгу ккавккун хъуна хьусса Нариман увну ур 1930 шинал.

Дяъвилул шиннардий школалий дуклаки­сса Нариман зий ивкIун ур колхозраву сакин бувну бивкIсса оьрчIалмур бригадалуву. Зийгу бикIайсса бивкIун бур вай, хьхьу-кьини къакуну, кув нувщуйн ва шагьнал лачIайн кказа буллай, кувгу ххулув батIлай, кувгу, чIун дуркIукун ахъул­сса, ахънилсри датIлай.

Колхозрал циняр давуртту хъунаналгу, чIивиналгу каруннах дувайсса, сайки чувчIаврагу цукунчIавсса транспорт къадиркIсса шинну.
1949 шинал, Нариманнул 7 шинал школа бувккусса чIумал, маэшатрал хъирив вайннал кулпатгу кьадарданул бувцуну бур Душанбайлив. Тикку Нариманнул къуртал бувну бур экономикалул техникум. Совет Армиялул къуллугъгу лавхъун, ялагу зана хьуну ур тиккуна.

Аслибика бувцуну махъгу вайннал Душанбайлив 10 шин дурну дур яхъанай. 1966 шинал бивзун бур Къизилюртлив. Микку Нариман зий ивкIун ур ичIаллил хIаллихшиннардал комбинатрай бухгалтерну. Цаппара хIаллава ивтун ур комбинатрал хъунаманал хъиривчуну. 1980 шинал увцуну ур Къизилюртуллал 4-мур школалийн захIматрал дарсру дихьлан. Шикку зий ивкIун ур 12 шинай.

Хъун дяъвилул шиннардий бивхьусса захIматрахлу ва кьамул увну ивкIун ур ветерантурал сияхIрайн, гьар шинах Ххувшаврил байрандалул хьунийн билаят­рал бакIчинаясса барча аврил чагъаргу бучIайсса бивкIун бур. Зий ивкIсса кIанттурдайгу Нариман лайкь хьуну ур чIярусса наградарттан ва хIурматрал грамотарттан.

Кулпат Аслибикагу Къизилюртлив чIявучин ххуйну кIулсса, бусравсса ва хIурматрайсса хъамитайпа бур. Оьрмулухун ва зий бивкIун бур шагьрулул автостанциялул чIаравсса мастерскойлуву дуссукъатлуву ссяткарну. Хъунмур никирал агьулданул ванийн учай­сса бур «Жула Ася» куну. Ссяткарну зузисса хъамитайпалия жунма нажагьссаннан бакъа къабавхьун­ссар. Му сянат тимар дансса душгу жула лакрал дянива бакъа бугу-къабукканссия. Ва пишагу ванин, гьай-гьай, цила буттая ирсирай бивну чIалай бур.

[dropcap]Б[/dropcap]увну бур Аслибика 1937 шинал КIундиннал шяраву. Ва чIивину бунува, ванил нину-ппу бивзун бивкIун бур ТаджикIнавун, Сталинабад тIисса шагьрулийн. Ти­кку ванил ппу Аьлил зий ивкIун ур ссяткарну. Дяъви байбивхьусса цалчинмур шинала Аьлил лавгун ур душманнащал талан. Аслибикал нину, бувцуну оьрчIругу, ма­хъунмай Дагъусттаннайн зана хьуну бур. Душмангу ххит увну, ххувшаврищал учIайхту, Аьлил кулпатращал цIунилгу зана хьуну ур ТаджикIнавун. Аслибикал шикку школагу бувккуну, ичIаллил комбинатрайн занай, ссяткарнал пиша лавхьхьуну бур. Аслибикан дуллуну дур «Отличник бытового обслуживания» тIисса цIагу.

[dropcap]В[/dropcap]айннал дянив хьуну ур шама арс. Хъунама арснал къуртал бувну бур ДГУ-лул юридический факультет, зий ур цIана Къизилюртуллал прокурорнал кумагчину. Дянивма арснал Багъирдулгу мува вузрал тарихрал факультет къуртал бувну бивкIун бур, амма баласса азар сававну, жагьилну унува лавгун ур дунияллия. ЧIивима арснал Арсеннул къуртал бувну бур Кирсановский авиациялул училище. Ласнал аьпагу бурувччуну, Аслибикагу утти, цила арсваврал оьрчIал ххари буллай бур. «Бусса оьрмулий вайннаха дуаьрдай бикIанна»,- тIий бур цуппагу.

Залму АьбдурахIманова