[dropcap]З[/dropcap]ахIматрал рынокрайсса захIматшивуртту чан даву мурадрай, республикалий идарарттал чIявусса зузалт щаллусса кьинирдай зий бакъашивугу хIисавравун лавсун,
ДР-лул Минтрудсоцразвитиялул хIадуршинна дуллай бур Дагъусттаннал давурттал дузал байминнан уттигу кумаг буван, кризисрайн къаршисса давуртту дузрайн дуккан дуваншиврул.
Мисалдаран, даву дакъа личIан нанисса идарарттал зузалтрал хьхьичIун ласлай бур чIумуйнусса зун (временная занятость) 9 зурул мутталий ца зузалан 15793 къурушрах. Мукунмасса зузалтрал хьхьичIун ласлай бур 6 зуруйсса зун жяматийсса давурттай. Мива зузалтран пишарду лахьхьин буллангу бакIрайн ласлай бур, цаннан 25000 къуруш личIи дурну.
Давурттал дузал байминнан кумагран арцу итадакьинну тIий бур давурттацIа хьусса идарарттал зузалтран, выпускниктуран ва давуртту дакъаминнан захIматрал хIакь лахъансса харжлугъ хIисавну цаннан 15793 къуруш дулун 3 зуруйсса.
Даву дакъа ливчIми даврил дузал буллалиминнан цаннан 60 азарда къуруш итадакьин тIий бур стимулирующие хIисавну. ЗахIматрал министерствалул бувсунни ми давуртту бартдигьавривух гьуртту хьун бюхъайшиву давурттацIа хьун нанисса зузалт бусса идарарттаща.
ДавурттацIа хьун наниминнаща, ягу даву дакъа ливчIминнаща хьунтIиссар электрон журалий (манзилданий) заявление чичин «Работа в России» тIисса порталданийн (www. trudvsem.ru).
Мунил хIакъираву АьФ-лул хIукму №460 кьамул бувну бур. Даву дакъа ливчIминнансса пособия бишинтIиссар заявление буллуну махъ 11-мур кьинилува. Апрельданий ва майрай му пособие бикIантIий бур 12130 къуруш (яла хъунмурди). Мукунма балугъравун къабивсса оьрчI-бакI бусса даву дакъаминнангу пособие буллантIиссар ца оьрчIан 3000 къуруш хIисавну.
