Щалагу билаятрай азурдасса тагьар сакин хьусса гьантрай, кьатIушав буккан нигьачIаву дусса инсантурах аякьа даву мурадрай,
чялишну давуртту дачин дурну бур Республикалул парламентрал вице-спикер, Дагъусттаннайсса «Справедливая Россия» партиялул председатель Камил Давдиев, партиялул бюрорал секретарь Мурат Пайзуллаев, ДР-лул Халкьуннал Мажлисрал аппаратрал каялувчинал хъиривчу Альбина АхIмадова, «Справедливая Россия» партиялул аппаратрал каялувчи Зурида Валиева.
Имара Саидова
Ва делегациялул сипталийну, махъсса гьантрай агьалинан бунни цикссагу кумагру.
Вирусрая нигьачIаву дуну, кьатIушав буккан къабучIи буллалисса (рискрал группалувун бухлахисса) инсантал цукун бурив, миннал ци тагьар дурив ххал дан ва ххуллух вай бувкIунни чIярусса шиннардий «Илчи» кказитрал редакторшиву дуллай бивкIсса, АьФ-лул ва ДР-лул лайкь хьусса культуралул зузала Качар ХIусайнаевачIан.
Ванил барчаллагь увкунни ва цихарасса аякьа хъинну бусрав хьушиву бувсунни, вай аьратталсса гьантрай цуппа хъамакъабивтун, цихра къулагъас дан бувкIсса хъамаллурахь.
