[dropcap]В[/dropcap]ай гьантрай МахIачкъалалив Къумукьнал театрдануву хьунни региондалул V –мур WorldSkills «Жагьилсса пишакартал» тIисса чемпионатрал хIасиллу дуллалисса шадлугърал мажлис.

---

И. Саидова
[dropcap]В[/dropcap]а чемпионатрал бяст-ччаллу най буссия МахIачкъалалив, Каспийскалий, Буйнакскалий, Къизилюртлив, Къизлардай, Хасавюртлив, Дарбантлив. Ххув хьусса ва цинявппагу гьурттушинна дурсса пишакартал барча бан увкIун ия «Жагьилсса пишакартал» тIисса кулпатирттал ва жагьилтурал Союзрал департаментрал проектрал каялувчи Александр Елумиев. Чемпионатрал даврил ахир дуллали­сса мажлис байбивхьуна ДР-лул кIулшивуртту дулаврил ва элмулул министрнал хъиривчу Альбина Аруховал.

— Ва чемпионат жула респуб­ликалун хъуннасса агьамшиву дусса хъанахъиссар. WorldSkills суккушиннарал чIалачIи буллалиссар кIулшивуртту дулаврил даража. КIицI лаганна, WorldSkills суккушиннаравух хIала бувхния шинмай респуб­ликалул кIулшивуртту дулаврил идарарттай лавайсса даражалул цикссагу кадарарду хIадур бувшиву.

Рязийну ливчIунна ва ххуллухсса чемпионатрал давугу лайкьсса даражалий лагаврия. ДакIнихтуну барча буллай буру вай бяст-ччаллавух чялишну гьуртту хъанай бивкIсса зун гъира-шавкь дусса цинявппагу гьурттучитал. ЧIа тIий буру гихунмайгу тIайлабацIуртту», — увкунни Альбина Аруховал.
Мажлисрай мукунма гьур­тту хьунни «Успех» тIисса жагьилтал давурттал дузал бай­сса центрданул каялувчинал бигарду биттур буллалисса Тамерлан Буганов, республикалул хъунисса предприятиярдал каялувчитал, кIулшивуртту дулаврил идарарттал хъуними ва чIявусса цаймигу.
Ихтилатру бувну махъ, сахIналий шадлугърал даражалий барча бунни ва медальлу ва наградартту дуллунни I70-ва журасса пишардал усттаршиву ккаккан дурну, ххув хьусса жагьилсса пишакартуран.

[dropcap]Ш[/dropcap]иккува бусан, ва чемпионатрай «Электромантаж» тIисса номинациялуву хьхьичIунсса кIанттурду бувгьусса оьрчIру даврийн кьамул бантIиссар «Дагъусттаннал сетевой компаниялувун». Му бакъассагу ва идаралул жагьилсса пишакартуран дуллунни Архызлив бигьалагансса путевкарттугу.
«АьсатIиннал пирог­ру баврил» номинациялуву хьхьи­чIунсса кIану бувгьусса пишакар тIайла бувккунни Ух­ссавнил Осетия-Аланиянавун аьсатIиннал пирогру баву хъиннура усттарну лахьхьиншиврул.

[dropcap]В[/dropcap]а республикалийн жагьилсса пишакар тIалав бунни Ухссавнил Осетия-Аланиянал региондалийсса WorldSkills суккушиннарал каялувчи Алана Моуравовал.
Чемпионатрай хьхьичIунсса кIанттурду бувгьусса пишакартуран дакIний личIансса бахшишру дунни «Ростелеком» компаниялул, «Россети» энергетический компаниялул, «Киргу», «Визаж Холл», «2 ГИС» идаралул, «05 ru» ттучандалул, «Сияна» кулинариялул центрданул, «Астрамед» цIуллу-сагъшиву дуруччаврил центданул, «СКФО-рал Строительтурал гильдиялул» ва цаймигу идарарттал.

Ххув хьусса пишакартал Да­гъусттаннал цачIундур командалуву гьуртту хьунтIиссар Кемеровский областьрай хьунтIисса WorldSkills Russia Миллатир­ттал дянивсса «Жагьилсса пишакартурал» Vlll-мур чемпионатрай.