[dropcap]Ф[/dropcap]евральданул 18-нний Дагъусттаннал БакIчи Владимир Васильев хьунаавкьунни «Россети Северный Кавказ» ПАО-лул гендиректор Виталий Ивановлущал.
Муний ххал бивгьунни Дагъусттаннал электросетирдал комплексрал тагьарданул ва мунил лябуккулул хIакъиравусса масъалартту.
Виталий Ивановлул сукку бунни аварияртту хьуну, чани лешлан бикIаврил хIакъираву. Мукунма бувсунни «Россетирдал» махъсса шиннардий дурсса давурттая. Мунал тIимунийну, апрель-май зурдардийнин къуртал дантIий дур «Россетирдал» группалул чулухатусса инвестициярттал лагрурду. ЦIанасса ппурттуву сайки 75-77% давурттал дурну дур. КIира шинал лажиндарай сайки 3,5 млрд. арцул харж дувантIий бур ми давурттан.
Виталий Ивановлул бувсунни мукунма аварияртту хъанахъаву чан хьуну душиву 24% хьхьичIра реконструкция дурну диркIсса шяраваллаву. Чани лещан байссар дянивну лавсун 1 ссят ва 53 минутIрайсса, муштариначIан нанисса токрал ххаллу дарзуну, дакьин даннин.
ДР-лул БакIчинал бувсунни чани лещан бавуртту ва чIирисса аварияртту гьарза хьуну душиву. «Ца ххуйшиву ххину дур, аварияртту духлаган даврил чIун чIири хьуну душиву. Амма, ми аварияртту гьарза хьуну, чирахъру чIявуну лещан буллалаврия я жу, я агьали рязину бакъару. Ученияртту дуллай бурхха, миннуясса мюнпат цир? ЦIана аьркинну бур кIантту-кIанттурдай инсантуран лахьхьин буван, миннаща бюхъаншиврул электриктал бучIаннин цайнува цивппа лещайсса энергоаппаратру цIунил базин сетрацIун. Яни штатрай бакъасса монтертал хIадур буван», — кунни В. Васильевлул.
Виталий Ивановлул бувсунни му бюхъайсса зат бушиву. Му даву дуван аьркинни муниципалитетирттал бакIчитуращал хIала-гьурттуну.
