ХIакьину жу бусан ччай буру миннувасса цанния – Гьун­чIукьатIатусса Къушиева Роза Шагьабуттиннул душния. Ва ниттил бувну февраль зурул 13-нний хъанай дур 90 шин.

Ванил буссия кIия уссу ХIажимурад ва Макьсуд, ца ссу Раисат. ЦIана ссу Раисат яхъанай бур арсначIа Бакуй, уссурвал тIурча, ахират­рал хьуну бур.

---

З. Аьбдуллаева
Розал буттан цIа дирзсса арснал Шагьабуттиннул, хъирив лавну, кIул бувну бур 7-8 никирайн бияннинсса цала тухумрал мархри. Хъинну куртI къахьурчагу, бусанну чан-кьансса му наслулия. ГьунчIукьатIатусса ХIажимурадлул ва Гьухъалиятусса Рабиятлул бивкIун бур ххаллилсса ххюя арс: Кьур­банмахIаммад, Аьбдулжаппар, Шагьабуттин, Загьиди, Бадави ва ца душ ТIагьират. Загьиди ва Бадави Хъунма­сса Бу­ттал кIанттул цIанийсса дяъвилул цIараву ливчIун бур. КьурбанмахIаммад, цIа дурк­сса мусил усттар, Бакуй яхъа­най ивкIссар. Душ ТIагьират тIурча, арснал арсначIа Къети-ХIажиначIа Анжилий буссия.

[dropcap]Я[/dropcap]ла захIматмур кьадар був­кIун бур Шагьабуттиннул бакIрачIан. Ва кулпатращал ва мукьвагу оьрчIащал ялапар хъанай ивкIссар буттал шяраву, зийгу ивкIун ур ттучандалий. Буслай бикIай, тяхъасса, мандолина бищун усттарсса, балай учайсса, инсантуращал авкьу­сса хъярчъчи икIайва тIий. Ванал кулпат Асиятлул ххуйну балай учайссия.

Каспийскалий «Двигательст­рой» завод буллан бивкIукун, Шагьабуттин лавгун ур даврил хъирив шагьрулийн, яла кулпат ва оьрчIругу бувцуну бур цачIанма. Зий ивкIссар шагьрулул общепит­рал трестрал хъунаману. Цува зузиссаксса хIаллай шяравасса тамансса арамтуннан давуртту хьун дурссар ванал. Миннавасса кIиннахь, Шагьабуттин контрреволюционерди тIий, къулбасру дан бувну бия.

[dropcap]И[/dropcap]юнь зурул 7-нний 1938 шинал хьхьувай бувкIун, шанашисса кIанава изан увну, увцуну ур. КIира шиннагу къархьусса чIанма-чIивимур душ Раисат, «мяммай» тIий, ччаннацIун лачIлай бия тIий, тай кьурчIисса чIунну дакIнин дичлай буслай бур Роза. Гьарзат бувчIухьунссия… «Тти мямма акъассар», — куну бур ганал. Вай махъва-махъсса махърур оьрчIан буттая бавсса. Мукьва оьрчIгу ливчIун бур ниттищал аьтIий.
Асият сайки гьарца кьини, цания-ца оьрчIгу бувцуну, занай бивкIун бур дуснакьрайн. Цищала лавгсса кьини, кьинибархан кIири бувсса бургъилу чурттуй щябивкIун, ялугьлай ливчIунав тIар Розал. Амма цичIав кIул бан хъанай бивкIун бакъар. Уттигу ци бакIрачIан бувкIссарив, чув увччуну уссарив къакIулссар. Махъ, 1956 шинал цичIав тахсир къабивкIшиврий ккаккан бувну бур, му реабилитировать увсса республикалул прокуратуралул чагъаргу бур РозачIа.

Мура шинал Асиятлун, гьарзатгу кьариртун, оьрчIащал шяравун зана бикIан багьну бур. Ми бакI буккан баншиврул 7 шинай фермалий дояркану зий бивкIун бур. Роза тIурча, ниттиуссил цачIава бацIан бувну бур.
1941 шин. Хъунмасса Буттал кIанттул цIанийсса дяъви. Укун дакIнин дичлай бур гай шинну Роза.
-Каспийскалий вокзалданийн гьарца кьини бучIайва поездру щавурду дирсса солдат бувцуну. Оьрус маз къакIулсса ниттирссу Насиятлул на буцайвав гиккун, цучIав кIулсса урив ккаккан, цIухху-бусу бан. Школарду, общежитияртту кIура баен бувну бия госпиталлайн. Ца кьини жун ккарккуна немецнал самолет, хъа щяв кьуртIуну дагьсса, гиву кIия летчикгу бия ливтIуну.

Цамур кьини ца ацIаксса бурттигьалт ххал хьуну, тамаша буллай буна, Насиятлун увчIуна жула шяраватусса Дандамаев Сулайман. Ттун бия яла ххуймур чу ганал бусса кунма, хьхьимичIругу кIяласса, Будённыйл чаха лавхьхьусса. На Шагьабуттиннул душ бушиву бувсукун: «Яр, даццил, ттун инагу ккаккайссияв, — куну, чаягу увчIун, на ххира бувнав.

Дука-хIачIанмунил хъинну кьянатсса чIунну дуркIуна. На цайминнащал карточкалий ччатI ласун хьхьувай очередь дугьан лавгссара цимилагу. Ттучаннай бакъая цIу. Ни­ттирссу Ссакинатгу, нагу «каменный карьерданийсса» бярдайн лавгун, цIил ххялчIив кьакьан дурну , дарваграй дирхьуну бучIайссияв. Му чIумал жун дия дурагу 11,14 шин. Дяъви най бухьурчагу, Каспийскалийн бувкIуна зверинец. Ттула хъинирву Аьлиев МахIаммадлущал му ккаккангу лавгссару. ДакIний бур хъунмасса шатта, пил, крокодил, дучри. Мунищала жу ккаккарду «Разгром немецких войск под Москвой» тIисса киногу.

МахIаммад сивсу­сса оьрчI икIайва. ЩихьчIавгу цIукъавххуна Анжилийсса горсадравун варани ккаккан поезд­рай лавгссагу дакIний бур. Къат­ри дуллалисса ясир-нимицнан дукия ларсунгу лагайсса ивкIун ия. ЧIявуну, тревога баян бувну, бомбоубежищалувун бучIайссияв. Циванъяв къакIула, къатрал нузру тIиртIуну кьаритира учайва, яла къатравух милицалт буккайва. Мукун най бия гьантри, барзру.
Га дия 1942 шин, сентябрь барз. КьатIув бувксса ттун «Топталовкалий» (махъ – ул. Советская 6-й дом) ххал хьуна халкь бавтIун. Жиндрал хьу­сса ччиту ххярххун, адамина ивкIуну ия. Арх дакъа 3 аьравагу дия дарцIуну. Ттун кIул хьуна гай Лаккуйн нанисса Хуразхъал Каримуллагьлул, Мусал ва КIямашатусса Мусал аьравал­тту душиву. Шаппайн бувкIун бусав ниттиуссихь.

Ганал, анавархъиндарай хIадур хьуну, кулпат, чIивисса душ, Ссакинат ва нагу бувцуну, миннащал шяравун ачин пикри бувна. Лях-карах КIямашрал Мусал аьравалттийгу щябикIлай, бавчуру. Манасрал авлахърай бия памма бувгьуну. Жун бувгьусса памма цалчин ккаклай бия. Сакинатлущал ца-кIира кьярти риртту­ссия. Къадардайн бивсса чIумал, Мусал жу букъахханшиврул хьуниххуллийх гьан бувнав. ЦIан лакьлай дия. Ца гьанав бигьалаган щябивкIсса чIумал, бавуна бурцIурдил «ав-ав» тIисса чIурду, яла жуяту арх бакъа ливхъун лавгуна.
Циняв бия бувххун, ккашилну, шанул къабучлай. Чан­сса шану лахъаннин Мусал тту­хьхьун дучрал хьхьуртти дуллуна. ЦIаннай ххуллийсса канава ххал къархьуну, аьрава кIура даруна. ЩинчIав цIунцIия къахьурчагу, аьрава гьаз дан мадара захIмат хьуна.

Ххажалмащиял багъирдаву хъюрт ххал хьуну, ттул нитти­уссу гай дансса кьасттирай уруг­лай уна, къаралчи увкIун, ги­ччагу бачIва бачин багьуна. Къабювхъуну, базаллува ца банкIа ницIай хъуварал лавсун, гай канай буссияв. Цукунни хъамабитайсса укунсса ххуллу?
Ххуллийх жул хьуну бия 5 гьантта. КIюрххицIунмай бивру Карашрал гаражрайн. Жул хьхьичIун дурккуна ччуччин­сса цIайнна дан нанисса мяммал дада. Ганин на найбуна къабувчIунав. Аьгу-аьтIий, ганил бувсуна хьхьичI кьини Ссакинатлул уссу Пайзуллагь баштан хьушиву. Дуснащал ахьтта най, гъарахьхьун биривнну, аьвкъуну къашай хьуну ия. Ттул ниттин га хъинну ххирасса ия. Му чIумал буттауссу Загьиди дяъвилий ивкIуну хъунма хIал хьуну бакъассия. Укунсса кьинирду къадурксса къуш шяраву нажагьссагу къабивкIссар.

[dropcap]Ш[/dropcap]агьрулий бивкIсса Розан оьрус мазгу кIулну, ду­ккингу хIарачат бусса кIул хьувкун, школалул директор Аьвдулкьадир Дандамаевлун му ца классрал хьхьичIун бу­ккан бан ччай бивкIун бур. Амма ни­ттийсса язухърал Роза, дуккавугу кьариртун, фермалийн лавгун бур. ЧIиви доярка ххира хьуну бивкIун бур цинявннан, хьугу цукун къахьунссия? Мурадав (ферма дусса зунтту) хъуними дояркахъал оьллу ттивзуну махъ, ванилгу, Сулайманова ПатIиматлулгу, ялтту був­ккун, накI цачIун дурну кIира ва дачIи (24 кг.) нагьлил дурну, складрайн диян дурну дур. Цукун тIайласса зузалт бивкIун бур ххал бара та кьянатсса цаннарагу дукан дакъасса чIумал.
Роза дакIнин бутлай бур ласнал ниттил Аьишатлул цихьва увкусса махъру: «Магъи дугьайсса уттуссаннуллича, ттул душ, ина хъунмамур арснал щар бухьувкун, вихь хъунмасса бияла буссар». Байбихьулул классир­ттал учительну зузисса ласнащал МахIаммадлущал Роза бивну бур къутандалийн, Карашав, КIубрав. Чан-чанну тIий къушлий гъаттарагу хьуну, хъу дугьлай, цала маэшат буллай бивкIун бур. Арулва оьрчIгу бацIан бувссар ччаннай.

[dropcap]Я[/dropcap]ла-яла дакIний дур КIу­бурдал шяраву дурсса 5 шин. Ттигу буслайнма бикIай хозяйка Гулизардуя, ласнащал зий бивкIсса учительтурая (МахIаммадрасул, Башир). Дарс дихьлан бувкIсса оьрус учительницахъащал дус хьуну, ванил лавхьхьуну бур ххуйсса канил кушурду, цийнура цилла янна дуруххаву.
Хъунмасса захIмат бивхьуссар Розал колхозраву, ванил канилух къадурксса даву дакъахьунссар. ХIакьину Роза оьрчIалгу, оьрчIал оьрчIалгу цинма ччикун ябуллай бур. Мукун бусравнува личIаннав цинявннан ина, Розай!