«Илчи» кказитрал гьашинусса 4-мур номерданий рирщуну дуссия «Жямат махъ ца бувну бакъасса чIумал» тIисса, ЧIурттащиял СПК-лул хIакъиравусса,

мунил цалий къадарцIусса тагьардануцIун дархIусса макьала. Жу аьлтту дурссия къачансса къулбасругу дусса жяматрал сходрал протоколданул материал.

Му СПК-лул вивссагу, лагма-ялттуссагу хIакъи-хIисав лахъисса бяст-ччалданийн кIура дарсса душиву чIалай, бувчIлай, жу чивчу­ссия редакциялул чулухасса биялсса хьхьичIмахъгу, ЧIурттащиял жяматрайн лабизлазисса, зуйва зува бавкьуну, щалагу жяматран кьамулсса дя дувара тIисса.

Мукун тIутIавугу тIайласса бушиву тасттикь хьунни цал уттигу. Ялув кIицI бувсса протоколданул материал «Илчилий» рирщуну мукьах жул редакциялийн увкIунни хьхьичIва бивкIсса «Дружба» тIимунин кIанттай сакин бувсса «Чуртах» тIимур СПК-лул каялувчи ХIажиев Сиражуттин, цалламур чулухасса жавабран кIанттайсса материалгу ларсун.
ХьхьичIмур материал рищайни кIицI дурну диркIсса принципгу дурурччуну, яни, цичIав ххи-чангу къабувну, бишлай буру кIилчинмур чулухаллил тIутIимунива кутIану язи бувгьусса ца­ппара кIанттурду.

---

ХIажиев Сиражуттин:
— Декабрь зурул 18-нний 2004-кусса шинал Лаккуй­сса ЧIурттащиял шяраву хьу­сса колхозниктурал собраниялий на увчIунав колхозрал председательну. Муния махъ, колхоз заллусса хъуслил думунил ва дакъамунил хъирив лаллай, миннул дазу-зума дан къабюхъантIишиву чIалай бия. Дусса аьрщаралгу, ризкьи-кьинилулгу сияхI личIан най дия гьаваллавура, ца базисса чулданийн дуккан къадурнура. Мунийн бувну 2006-ку шинал, цIунил дартIун колхозниктурал собраниягу, хIукму був­ссия «Чуртах» тIисса колхоз кIура даен дан мура цIанилусса СПК-лийн.

Аьрщивгу цIакь дурссия СПК-луцIун. Муния мукьах, хъунмурчIин ттула кашилуцIух, колхозрал ливчIсса буржругу лавхъун, на айивхьуссияв зун. Ларсун банкрая кредитгу, нани дурну ивкIра хозяйство. Му чIумул мутталий тIурча, «Дружба» тIисса цамур СПК-гу сакин бувну, гьарзад цахьхьунна ласлай бувккунни ттул оппонентътал. Зунттавуми аьрщив къагьану, миннал кьаст лархIуну дур цала биялалухьхьун ласун Бабаюртуллал зоналул къутандалий на лябукку буну зузи дур­сса аьрщивгу (1824 гектар). Ттул кIунттихь бур ми аьрщарал ялувсса ихтияр на каялувшиву дуллалисса СПК-лухь душиву тасттикь буллалисса судирттал хIукмурдугу.

Редакциялул чулуха

ХьхьичIмур макьалалуву аьл­тту бувмургу, ттимуниву тIутIимургу цачIу бивхьуну, ца базисса пикрилийн бучIан хIарачат буллалисса чIумал, цинияргу хьхьичI загьир хъана­хъисса затну бур укунсса зат – пIякь бивкIун чIалай бур ЧIурттащиял жямат кIи-шан бивщуну бушиву ва му кIантту мукун буссаксса, цинявн­нан цасса дягу лякъин сайки бюхъантIий бакъашиву.

Мунийн бувну редакциялуща хъанайгу бакъар тарап дургьуну бавцIуминнал цания ца чул бугьан. Ва мунийнма бувну редакциялул цийвасса буржну ккаклай бур цал уттигу щалагу ЧIурттащиял жяматрайнсса лабизаву дуван – шяравуминнайнгу, шагьрурдайминнайнгу, лахъи ларгсса му ччалаччаву чулу щавуйн дукканнин, хIакьмунил ххуллу-ххуттай ххалгу диргьуну, чIявуминнан кьамулсса бази-кьутIилийн дуккан дара тIисса ниятрай.

Шиккува ххигу буллай буру: дянив бяст-ччал хIасул хьусса кIирагу чулухаллил учин ччимур жу чанну-ххину аьлтту барду, редакциялул мурадгу ванийну байливтIушиврун ккалли буллалиссару.