Вай гьантрай ДР-лул Жяматийсса Палаталул хъунаманал хъиривчу Ссапарбаг АьбдуллаевлучIа хьунни Гъумукун биллалисса кIанттай буллалисса Къапу-КIаландалий чичинсса цIанил ва текстрал масъала ца чулийн бутлатисса батIаву.
Муний гьуртту хьунни Лакрал райондалул бакIчи Юсуп МахIаммадов, аьлимчу Эса Аьбдуллаев, республикалул Хъунисриннал советрал хъунаманал хъиривчу Сиражуттин Илиясов, аьлимчу-тарихчи Тамерлан ХIажиев, Шалласу Шалласуев, «Илчи» кказитрал хъунама редактор Руслан Башаев ва цаймигу жяматийсса ишккаккулт.
БатIаву дансса багьана хьунни «Илчи» кказитрай жула хъунасса аьлимчу Эса Аьбдуллаевлул текст рирщуну махъ соцсетирдай личIи-личIисса лакрал группардаву му къапулий чичинсса цIанил лагма сукку хьусса бяст — «Кази-Кумух» бакъарча чичин аьркинсса, «Гази-Кумухри» тIисса.
Юсуп МахIаммадовлул кIицI лавгунни паччахIлугърал къуллугъчи хIисаврай, му цIа тарихраву ва паччахIлугърал документирдай дусса куццуй Кумух тIий чичавриву цанна къулайшиву чIалай духьурчагу, ва суал жяматрай, хьхьичIва-хьхьичI мазраха ва тарихраха зузисса аьлимтурай бишин хIукму бувшиву цала. Бувсунни «Илчилий» бувксса текстрая махъ, соцсетирдай бакъасса, цачIанмагу чIявусса инсантал оьвтIий бушиву къапулий «Кази-Кумух» тIий чичин рязи бакъасса.
Га хьунабакьаврийгу пикрирду личIи-личIисса бия – цавай паччахIлугърал документирттай бусса куццуй чичин аьркинссар тIисса, цавай – лакку мазрай Гъази-Гъумучи тIий чичин аьркинссар тIисса.
Ахиргу хIукму бунни, агьалинан «Гъази-Гъумучи» тIий чивчуну ччай биявхьур, мукун чичин. Къапулий бищунсса текстрал ялувгу пикри бунни, Эса Аьбдуллаевлул чивчумур гьануну лавсун, кутIану бищун.
