Февральданул 13-нний ДР-лул экономикалул территориал лябуккулул министр ХIажи Султановлул пресс-конференциялий журналистурал суаллахьхьун жавабру дуллуссия. Жу мунияту чивчуссия хьхьичIмур номерданий. Уттигу ххи бан ччай буру цаппара кIанттурду.

«Ттул Дагъусттан» тIисса республикалул приоритет проект дузрайн дуккан даврил ва инвестициярттал программа бартдигьаврил хIакъиравусса суалданухьхьун жаваб дуллай, министр­нал бувсунни дукIу му ххуллий тамансса давуртту дурну душиву. «Ттул Дагъусттан – ттул щин» тIисса проектрал лагрулий цIусса щинаххуллурдацIун дарзуну дур 48 шяравалу. Гьашину агьали щинал щаллу буван личIи бувну бур сайки 4 млрд. къурушрал.

2019 шинал дайдирхьуну дур инвестициярттал программалул давурттаву дахханашивуртту дуллай. Гьашину му программа цIакь дурну дур бюджет­рал закондалий 3 шинал му­тталийсса.
Мукунма министрнал бувсунни щин марцI дайсса сооруженияртту ва канализацияр­тту даврил хIакъиравугу. Мунал тIимунийну, Аьрасатнал Кьиблалул федерал мурадлувсса программарттал лагрулий хъунисса шагьрурдай буллан байбивхьуну бивкIун бур му журалул сооруженияртту, яла ми дуллалаву дацIан дурну дур. ЦIанасса ппурттуву, ДР-лул Строительствалул министерствалущал цачIуну ми объектру ххал бивгьуну, хIарачат буллантIий бур ми арцул дузал буван. Дарбантлив ми сооруженияртту дуллай бур. Избербашлив бувну бур республикалул бюджетрал арцу харж дурну.

ХIажи Султановлул бувсунни «Каспийск» ва «Дагестанские Огни» ТОСЭР-дал (территория опережающего развития) хIакъиравугу. Мунал тIимунийну, цIанасса ппурттуву «Уйташ» тIисса инвестициярттал лагрулий буллай бур пюрундалул ххаллу (стекловолокно) ва полиэтилен дайсса завод­ру. Ми кIивагу завод гьашинува зий байбишинтIий бур. Гьашину буллан най бур 2 завод цаймигу – алкоголь дакъасса хIачIиярттал завод ва дикIул сурсатру дай­сса завод. Ми бакъа­ссагу, «Дагдизель» заводрал аьрщарай бувантIий бур индустриал парк. Мунил документру хIадур бувну бур.

Министрнал жаваб дуллунни республикалун дуллусса 1 млрд. ва 267 млн. къурушрал грант харж даврил хIакъиравусса суалдану­хьхьунгу. Мунал бувсмунийну, жяматравасса чIявуминнал пикрилий, ми харж дуван аьркинни тIий бур цIуллушиву дуруччаврил, дуккаврил ва ххуллурду баврил иширттан. Амма уттигу му ма­съала ца чулийн бувккун бакъар. «Мунил хIакъираву жу зухь ттигу бусланну», — увкунни ХIажи Султановлул.