ЦIулаганнав ина, жул Буттал кIануй!

Хъусращиял жяматрал хIакьинусса ва гьунттийсса мурадру

[dropcap]Ф[/dropcap]еврал зурул 18-нний Каспийск шагьрулий Машиностроениялул ва сервисрал колледжраву хьунни Хъусращиял жямат цачIун бавтIсса мажлис. Шикку ххал бивгьунни шяраваллил багьу-бизу къулай баврил хIакъиравусса масъалартту.

Ва ххаллилсса сипталул сакиншинначитал хьунни жяматрацIун дархIусса гьарицагу даврил чIарав мудангу сахаватлувну бацIайсса «Дагестан» авиакомпаниялул хъунама директорнал маслихIатчи Жабир Абакаров, Дагъусттаннал машиностроениялул ва сервисрал колледжрал директор МахIаммадрасул Муслимов, ДР-лул Халкьуннал Мажлисрал депутат Камил Давдиев, Республикалул агьалинал ихтиярду дуруччайсса центрданул каялувчи Аьлил ХIамзаев, ДР-лул Шяраваллил хозяйствалул министертствалул управлениялул хъунама Эмил Татаев, «Справедливая Россия» партиялул вакил МахIаммад Валиев ва шикку кIицI къалавгсса чIявусса цаймигу.

Имара Саидова
Мажлис бачин бувну ия ДР-лул Халкьуннал Мажлисрал депутат Камил Давдиев.
— Махъсса ппурттуву, жунма чIалачIисса куццуй, агьали хъуннасса къулагъас дуллай бур цивппа лявхъусса минарду дуручччаврих ва ядаврих. Жулвагу ва батIаврил мурад мури хъанахъисса. ЦIанасса замана цуппагу бур жува лявхъу­сса минардайн кIункIу буллалисса. ХIакьину зущал шикку маслихIат ккаккан ччива дан бучIимунил ва мюнпат хьунмунил хIакъираву. Цинявппагу кувннай кув бавкьуну, цачIун хьуну бакъа жущара даву дан къахьунтIиссар. Мунияту ттун шиккун бучIан къабювхъуминнахьгу бусан ччива жува бувсса хIукмурдая ва вичIи дишин ччива минналми пикрирдахгу.


Цалчинсса давунугу дайдишин ччай буру Хъун дяъвилия зана къавхьу­сса вирттавран дирхьусса гьайкал цIу ду­ккан дурну, циняв­ппагу гьуртту хьуминнал цIарду ду­сса мармарчарил ула лачIун даврия.


 

Жабир Абакаров

Цалчинсса давунугу дайдишин ччай буру Хъун дяъвилия зана къавхьусса вирттавран дирхьусса гьайкал цIу дуккан дурну, циняв­ппагу гьуртту хьуминнал цIарду ду­сса мармарчарил ула лачIун даврия.
Хъирив, август зурул 8-нний, кIицI лаган ччай буру Хъусращиял шяраваллил кьини. Мунил мурадгу дуллу дунияллийх ппив хьусса, кувннах кув мякь бувксса жула жямат цачIун бавур. Ялагу, цинявннахь миннат бан ччива, ца­ппара гьантрал хьхьичI бувкIун, цала-цала ужагъирттай низамгу дирхьуну, шяраву дуллали­сса субботникравух гьуртту шаву. Вай цинярдагу давуртту дузрайн ду­ккаву мурад­рай, сакин дурну дуссар шяраваллил фонд. Умуд бур, ва давривух цума-цагу хъусичу гьуртту хьуну, цалла-цалла буттал къатригу цала бюхъайсса даражалий дакьин дуллай, жула шяравалу уттара дуккан данссар тIисса, — увкунни Камил Давдиевлул.
Ванал бувсуна мукунма махъсса шиннардий шяраву тамансса хайр-мюнпат бусса давуртту дуршиву.

 

Аьлил ХIамзаев

Ларгсса шинал «100 школа» тIисса республикалул программалийнгу лавсун, ремонт бувшиву школа, бувну къуртал бавай бушиву ФАП.
Ва батIаврий гьуртту хьун гъирарай бувкIун бия шяраваллил администратор Эдуард ХIажиев, СПК-лул председатель Георгий Рамазанов, школалул директор ШайхахIма АхIмадов.
Эдуард ХIажиевлул цала ихтилатраву кIицI лавгунни шяраву духсса къатри цIу дуккан дуллали­сса, цIу-цIусса къатри дуллали­сса инсантал гьарза хъанай бушиву. Мунийну шяраваллил чIалачIин ххуй шаврицIун кIиккувасса жагьилтуран дуллансса давугу хъанай душиву. Мукунма ванал бувсунни цалла цIа-бакI кIицI къадурну ччисса жагьилтурал ка-кумаграйну шаннагу хIатталлил лагма дургьушиву цIусса чапарду, кIийвасса ва шагьрулиясса жагьилтал цачIун хьуну, школалул чIарав ххаллил­сса багъ бувгьушиву.

 

Камил Давдиев

Мажлисрай аьщу-ххуттай авцIусса махъ лавхъуна батIаврил инициатор Жабир Абакаровлул.
— Жуйвасса буржри жула ппухълу занай бивкIсса, жува лявхъу­сса аьрщи ядаву, жула шяраваллил бучIантIимуния пикри баву. ХIакьину буниялагу ххарину ура жула шяравалу цIулаган даврил хIакъиравусса масъаларттал ялув цачIун батIаврия. Гьашинусса шин Ххувшаврил 75 шинал юбилейрацIун дархIусса дунавхьур, аьпалул хьуминнал хIурмат баву мурадрай, ххуйсса пикри хьунни дяъвилул гьурттучитурансса гьайкал цIу дуккан дан­сса. Вара юбилейрацIун бавхIуну, ххуйну хьунссия ряха арс дяъвилия зана къавхьусса ниттин – Валиева Баллан шяраву гьайкал дацIан дарчан.
Жува хъиннува ххари хьунсса ишну чIалай бур, цивппа кIий хъуни хьуну бакъанагу, буттал кIантту ххирасса бушиву ккаккан буллалисса, хъин-хъинсса давуртту дуллалисса жагьилтал ялун личлай бушиву. Вайннал хъунмасса кабакьу буллайгу бур жура дуллали­сса давурттан. Умуд бур гьашинугу жура ххуй-ххуйсса давуртту дан­ссар тIисса, — увкунни Жабир Абакаровлул.
— Ттун тачIав дакIния къабуккай цIанихсса жула шаэр МахIаммад-Загьид Аминовлул 9-мур Майрал байрандалий увкусса махъру: «Жува так ца ва жула хьхьичI бивхьусса ссупралул бакъаруча цачIун буллалисса, укун яхъананшиврул жан кьурван дурсса ппухълуннал цIанийру шиккун бавтIсса»,- тIисса. Жува мудангу хIарачатрай бикIан аьркинссару жула ппухълуннал аьпа кьадрулий буруччин, — увкунни Аьлил ХIамзаевлул.
Лакрал радиолул хъунмур редактор Тамара Закарьяевал ва «Илчи» кказитрал журналист Зулайхат Тахакьаевал бувсуна укунсса мероприятиярттал хIакъиравусса цайми-цайми щархъал опытраягу.


[dropcap]Ч[/dropcap]ансса бакъая ва кьини шяраваллил цIа-кьини хъун даву мурад­райсса дакIнихтунусса ихтилатру буллалими.
БатIаву д-усса кIул хьуну, цалва аьрххигу махънийн бувтун, жямат­рал цIанийсса давурттавух хIала уххан цува мудангу хIадурну ушиву бусан увкIун ия Москавлив ялапар хъанахъисса ЩайхахIмад Раджабов.
Цинявппагу бувкIминнал цIания Дагъусттаннал халкьуннал учитель ХIасан АхIмадовлул барчаллагь увкуна ва батIаву цала каялувшиву дуллалисса колледжраву дурсса, цалагу ученик МахIаммадрасул Чираковичлухь ва цинявппагу гьуртту хьун бувкIминнахь.