Ларгсса нюжмар кьини МахIачкъалалив, Республикалул онкологиялул диспансерданий, тIивтIунни цIусса поликлиника – ца сменалий 200 къашайшала кьамул увансса ва 40 къашайшалан стационарданий кIану бусса.
П. Рамазанова
Цимирагу шинъя ва азарханалул къумасса поликлиникалий агьалинал ккучунну чан хъанай дакъашиврияту рязий бакъа гъалгъа тIий, чичлай. Поликлиника тIитIавриву гьуртту хьунни Дагъусттаннал ХIукуматрал хъунаманал хъиривчу Анатолий Карибов, цIуллушиву дуруччаврил министр Жамалуттин ХIажиибрагьимов, Халкьуннал Мажлисрал депутатътал, жяматийсса ишккаккулт.
КIицI лавгсса азарханалул хъунама хIакин Владимир Брежневлул бувсунни поликлиника уттизаманнул ххуйсса оборудованиялул дузалну бушиву ва циняв анализру дулавансса лабораториягу бушиву. Гьаннайсса, диагностикалул даву гьаз хьунтIишиву ва республикалул агьалинан утти обследованияртту дуллан республикалул кьатIушав занансса чарабакъашинна къадикIантIишиву.
