[dropcap]М[/dropcap]ахIачкъалалив 1935 шинал сакин бувну бивкIун бур «Дагестан энерго» тIисса идара. Мунил хъунаманугу ивтун ур Чавтараев МахIаммад Ибрагьиннул арс,
цалгу дахьва Москавуллал гидротехникалул институт къуртал бувсса, Дагъусттаннаясса цалчинсса инженер-гидротехник.
Гара шинал, Гъумучиял Хъуннеххайсса ГЭС бувну, Строительствалул управлениягу лавкьуну, мунил хъунаману ивкIсса Закарижа Ххираманов «Дагестан энерголул» хъунама инженерну гьан увну ур.
Амин Аьбдуллаев
1935 шиная 1951 шинайн бияннин «Дагестан-энерголул» хъунаману ивкIун ур М. Чавтараев, 1951 шиная 1955 шинайн ияннин – С. Оьмаршаев, 1955 шиная 1961 шинайннин – Гончаров, 1961-1964 шиннардий – Ю. Чавтараев.
М. И. Чавтараевлул 20 шинал мутталий каялувшиву дуллалисса «Дагэнерголул», бугу-бувну, ток буллан итабавкьуну бур 75 ГЭС. Ми электростанциярттал гужгу бивкIун бур 4850 КВт. Миннул гуж ишла буллай диркIун дур 153 колхоз-совхоз.
Тай хьхьичIвасса ГЭСирдая цIана цичIав лирчIун дакъар. Амма жунма гай хъамабитан къабучIиссар. «Дагэнерголул» хIакьинусса музейраву цаягу жула инженернал цIа дакъая, ца Нураевлулсса личIаннин.
1924 шинал Германнал Бадан тIисса шагьрулий Куматусса Закарижа Ххирамановлул къуртал бувну бур институт, хьуну ур инженер-электрик. Гъумучиял ГЭС ванал каялувшиврий бувну бур. «Бакинский рабочий» тIисса кказитрайсса макьалалий бур чивчуну кIа ГЭС бувсса инженернан бищунсса багьа бакъар тIий.
1935 шиная байбивхьуну 20 шинал мутталий лаккучунал каялувшиву дуллалисса Дагэнерголул бувну бур 74 чIиви ГЭС.
Амма мунал цIагу дакъая «Дагэнерголул» музейраву. Дакъая уссурвал Чавтараевхъал цIардугу, дакъая Мунчаев Ибрагьиннулссагу. ЦIанакул, хъунисса миллион КВт булайсса ГЭСру буллалисса чIумал, ми мюрщи ГЭСирдалми тарих хъамабитлай бухьунссар. Ттул пикрилий, гай мюрщиминнулли хъуниминнун ххуллугу тIивтIусса.
