Аьжаивсса замана бувкIун бур.КъакIулли заманарив баххана хьусса, юхсса жуварув, бахханагу хьуну, цамур тайпалийн лавгсса.
Тамансса иширттаву начливун агьсса, юрухъ-ххуллу лахъан къавхьусса кIанттурду хъанай бур. ЧIахху-чIарах ва ца жяматрай бивкIсса, хIатта гъан-маччашиву дусса инсантал ахиратравун лавгшивугу къабавнува, кIул къавхьунма ливчIун, бивкIулул заллухъруннал хьхьичI, цайвасса адаврал бурж къалавхъун ливчIун, хъинну начливун агьсса тагьар хьусса ишру хьунабакьлай бур. (Укуннасса тагьарданувун на навагу агьра ттула чIивинияцIасса уссу кунасса Зайдул рухIирал хьхьичI, Ккурккуллал жяматрал хьхьичI.
[dropcap]М[/dropcap]унал хавар хъинну чIалну, кказитгу махъ бивну, лажин дугьан къахьунсса иш хьуну). Амма бивкIулул заллухъруннан, гъан-маччанан бивкIу, ци чIун лях гьарчангу, мудан дахьва ттигъаннусса ишну чIалачIиссар. Ттунгу, шин лях ларгнугу, чIалну бунугу, ттуйвамур бурж лахъан ччан бивкIунни. Мукунсса ниятрай ца-кIива аьпалул махъ учин ччай ура.
Лакрал тарихраву машгьурсса Ккурккуллал Зайдул ва ЧукIундалавл тухумирттал хIакьсса варисну хъанахъисса Ккурккуллал Зайду дукIу, ца шинал хьхьичI, ахиратравун лавгуна. Му бявкъусса хаваргу – Зайдул жижаралий, тамансса чIунгу лях ларгун, на «Илчилий» бувккуссия. ТIилипундалувух мунал гъан-маччаминнайн оьвчин къавхьуну, на Ккурккуллал жяматрал хъуначу Магьдиев Аьбдуссаламлуйн занг дурссия. Зайдул жижарагу бувну, мунал рухIирая алхIамгу бувккуссия.
Цайвасса лаккучушиврул бурж Зайдул цанма Аллагьу Тааьланал буллусса оьрмулул лахъишиврий узданну лавхъссар, лаккулугърал гьиву хIучI къакуну ларсъссар, Кьиямрал ЦIуххалдарайгу Зайду лажин кIялану ва сивсуну ацIантIиссар.
СсукIурай щяивкIун, алалав бан къавхьусса ххуллий, ахиратравун лавгманал аьпагу увкуну, мунал рухIирая цахьва цалва алхIам буккирчагу – мугу аьпалувух ивхьуманал ва бивкIулул заллухъруннал хьхьичI чанссавагу цайвасса адаврал бурж лахъавуну хъанахъиссар.
Зайду ттун ттунна кIулши хьуния махъ дакIнийсса жяматрайчу ва чIаххувчу ия. Жу ца махIлалул оьрчIру бияв. КIа чIумал ккурчIригу бугьара арамтуннал ва кIичIиртту мюрщи оьрчIал бувцIуну бикIайва. КкурчIа-чIирахаллурдугу, ваца бярабакIуртту бакъасса чIанкIрал дачIрасса цIияллурду кунна, кIачIану къадикIайва.
Жул махIлалул оьрчIавухгу, мудан куна, Зайдугу икIайва. Мунайн Ккурккуллал Зайду учирчагу, му, махъ бакъа, Гъумучиялгу инсанъя, цувагу Луртту махIлалиясса Зайду ия. Мунал цалагу мудан, хаснува цалва хъярчирдавух, цала ккурккулгу гьарзану бавтIний «вар, жува буру гъумучи, жува ккурккул, щархъи бакъарухха», ягу «на гъумучиричура, на, вайми кунасса, щархъиричу, вицIхъиричу, ккуркличу акъарахха» учайва.
Ттун, бунияланугу, Зайду чIивинияцIакула ттула махIлалийчу, жяматрайчу ва шяравучув ия. Яла-яла ттунма асар шайсса зат му бияхха, мунал та жагьил заманная, аллагьакъултрал заманная шихунмай ттуйн, хъярчирай бикIу, буниялттун бикIу, «диндалул уссу» бакъа къаучайссия.
Зайду Ккурклияту увкIун ухьурчагу (мунал ппу Зайдилавхъал Сани адвокатъя), му жул махIлалийчу ия. Нинугу Бани-баба дия, жугу, махIлалул оьрчIалгу мунийн, Зайдул учайсса кунма, Бани-бабайя учайсса.
Луртту махIлалул (Лурттущиял) ва лагма-ялттусса чIахху-чIарахнал мюрщи оьрчIру тамансса бикIайва, ми цивппагу Гьухъаллал бярнил лагмасса кIанттурдай бавтIун бикIайвав. Ми оьрчIругу, Гъумучиял ва Гьухъаллал бакъассагу, Гъумук зузисса, щархъаяту бувкIсса къуллугъчитурал оьрчIру бикIайва, амма ми цинявппа ца жяматрал ва махIлалул кунмасса бикIайва, «Гъумучи/ щархъи» тIий, личIи буллалаву къадикIайва.
Та чIумалсса ттул ва Зайдул оьрмулул оьрчIру тамансса бия: ТIухIул ЦIаххуй («КIартIилла»), Явюбукухъал Катив ва ХIамзат, Абухъал Эсмаил, Хъатумихъал Гъази, Макъихъал ХIусайн, Нураттинхъал Илдар, Гьуйннал Чавтара («Ттутули») – милица Аьбдуллул арс, Муккурдал Нуруллагь, Парамазхъал Шамил, Гьухъаллал КьурамахIаммад («КьурахIа»), ЦIургъул Загьиди («Удилли») ва тамансса цаймигу.
Тай оьрчIал ккурчIа-чIирахсса тIуркIурду, хъярч-махсартту хъинну тIирхъасса, дирисса, щурущин гьарзасса бикIайва: лихъулий буккаву, лакIрай буккаву, пянцIлий буккаву, бястлий лечаву, кIиттуршай буккаву (жуярва хъуними). Гъинттул Махънеххайн бучIан лагайссияв. Та чIумалсса жула шяравусса оьрму, лянхъа тIисса туннурду кунма, яргсса, щурущисса бия. (ЦIана тIурчаннив, ккампIъютIурдаха, телевизордаха бизансса курчIил, ваца сухун багьсса кунма, ливчIун бур).
Зайдугу жул дус ия, жул цинявппагу тIуркIурдавух мудан мугу жущал архIал икIайва. Амма та чIумала мунай ца аьжаивсса мугьрулул лишан хIисав шайва.
[dropcap]М[/dropcap]унаву чIивинийва цайми ххари бан, тяхъа бан, дялахъру хьун дан, хъярч-махсара бан, хIазсса увин дан бюхъаврил пагьму-гьунар ххишаласса бия, му мунаву Аллагьу-Тааьланал бивхьуну бия.
Ттунгу, та жула махIлалул оьрчIангу цаппара Зайдул хъярчру, увинтру дакIния къадуккай, ми дакIнийн дагьувкун, оьрмурду лахъи шай. Бусанна та чIумал Зайдул дурсса ца «бунтираясса» хаваргу.
Зайдул бунт
Ца ххуллух Зайду, шава ссайн къаччан бивкIун, ссай рязи акъа ивкIссарив, «бунт» дуллай («протест баян буллай») сукку хьуну ия.
Хьулухунгу увккун, дарвазалучIагу авцIуну, щалва махIлалунгу баянсса чIуний Зайдул оьвкуну бия:
– Бани-бабай! Ва Бани-бабай! На ава-авчуссара!
– Чун авчуссара? Циван авчуссара?! Ина ци тIиссара?
– Ккурклив авчуссара! Ттул утти шикку цичIав дакъассар! Лава-лавгссара! Тти на шикку къаацIайссара, шиккунгу къаучIайссара!
Цаппара хIаллава ялагу Зайдул чIу:
– Бани-бабай! На найна ура! Гьухъаллал бярничIан ивра!
– Бани-бабай! На Къичил-КкурчIав ивра!
– Бани-бабай! Ури-Гъазинайн ивра! ТтарлихIав ивра! БахIикIуллал гьарахъалттучIан ивра!….
Укунсса ихтилат буллай гьайхьунссия ца ххюра минутI. Яла Бани-баба дурккун хьулухун, ххал арчан, Зайду цала хьулучIату яла лавгхьурчан ца 20-25 шаттирал ялавай хьуну, Лурттущиял ккурчIнил хьхьичIсса, чIараввасса Хъатумихъал ахънил хьулучIанайвагу къаивну. Маз-кьаз бивхьуну, Зайдухь хъинсса махъ бувсун, маслихIат хьуну, дакьил шайссия. Амма Зайдул «бунтирал» хавар щалвагу махIлалул оьрчIан оьрмулухун дакIний ливчIуна ва мудан му дакIнин бутлай, миннан оьрмурду лахъи буллай, ми хъинну ххари байва, хъамакъаритайсса оьрчIнийсса шинну Зайдугу архIалну дакIнийн дичайва. Вана ва бур гьунар: цува дакIнийн агьаврийнугу циняв цалва кIулми ххари-тяхъа бан бюхъаву. Зайдуву тIурчан, мукунсса гьунар ххину бивхьуну бия.
[dropcap]О[/dropcap]ьрчIзаманагу лавгун, хъуни хьуну махъгу Зайдул арарду цала дустуращал хIура къадуруна. Жун му гава Зайду ия. Амма муначIа буниялашиву дия. Дустурал чIарав ацIайва, ка-кумаг бан, дуллалисса давривух хIала уххан хIадурна икIайва. Тамансса цала дустурал ва миннал лагма-ялттуминнал хъатIал сий ларай дайва.
Хаснува бусан ччива му тамансса шиннардий «Мясокомбинатрай» зий, чIявуссаннан хIаллихшинну дуллай ивкIшиву. Масала, бивкIу-буккулул бихху шагьрулий аварасса иш бикIайва, таманссаннан Зайдул му чулуха хъинну ка кIидахIайва. Миккугу Зайдул – цалва хъярчру. Мунияту Зайдул цIа цинявннал бусраврай ва аьпагу увкуну зумух ласай. Вана вари аьпалувух ивхьуманал цIа абадлий ядуллалаврил, му дакIния къауккаврил хIакьсса барашин.
«Пагьламантал»
«Жул мясокомбинатрал циняв зузалт акробатнал–пагьламаннал пишагу лахьлай буссар. Му къалахьхьирча, миннаща цалва битIирбахъи бан (бакI буккан) къашайссар: хIаятравусса дикIул хханхха, ваца пирпилу кунма, гьаз бувну, цалва ялтту ва чIирал (барулул) ялтту хьулухун палцI бувну бутан аьркинссар. Акъахьурча, вин ччатI бакъассар. Ишру мукунни бусса». (Вагу Зайдул хавар.)
Зайдул «Мясокомбинатрал» хавардавасса «Мазу» тIисса ца цамургу хIазсса хавар жула чичу Илиясов Хизрил цала луттираву ттигъанну дунияллийн буккан бувунни. Му хъярчийсса хаварданувугу Зайдул «Мясокомбинатрай» зузийни хьусса «тахсир бакъа танмихIрая» асар хьунсса куццуй бувсун бур.
ХьхьирицIгу – Лакку ккурчIа
Аьпабиву Зайдул цала «Хъяхъавринсса 20 минутIрал» манзилданий Щюлли хьхьирицI, Лакрал ккурчIав, цал дурккусса, дирхьусса лакку мазрал дарсирал бувмур цIанакулсса лакку маз буруччаврил, хъамакъабитаврил, лахьхьин баврил ккураннал, фондирдал, ассоциациярдал тачIав къабайссар. Зайдул увкумур аслийсса ххаллилсса Лакку Махъ буну тIий, хъамагукъабитайну тIий.
Му ккурчIав Анжиливсса лакрал жямат батIайва, жулва личIи-личIисса чиваркI бучIайва: ччарча дурккусса, чантI кусса, ххаллилсса пишакартал ва къуллугъчитал, ччарча укунмасса захIмат-пишалул агьлу… ХIакьсса лакрал жямат. Миннавух цIана аьпалувух бивхьуссагу тамансса буссия: Хъювхъиял МахIач, Ккуллал АьлихIажи, Оьргъу, СумбатIуллал Аьбдул…
КкурчIавгу Зайдул кьянкьасса низам дирхьуну дикIайссия. КIюрххил арулуннил дачIи хьуннин къаувкIманай, яъни чIал хьуманай – аьчIа, аькIлунгу – кIиринмасса нисирай ччатI – гава кьини кьунниялай миннанний – аьчIа ялув хьуманачIа. Миннухунгу – «ххютту ццах учин данмур». Ца-кIиннан му аьчIа дулун багьуна, яла, туну, «ххирану дацIлай дур» тIий, чIал къахъанай, хьхьирийн кIюрххийх цила чIумал букIлакIи хьуна. Вагу Зайдул хъярч-низам дишаву дия. Ца ялагу, микку дирхьусса, цумацанналгу дуруччин хIарачат буллалисса низам – гъалгъа лакку мазрай баву дия. Ва тIалавшингу Зайдул хIура дуккан къаритайва. Тахсир хьуманай ва иширавугу чIири-хъунсса аьчIа ялув шайссия. ЦIанакул сийлий буссар личIи-личIисса мазру лахьхьин кабакьу байсса «Лингвистикалул гъинттулсса учкъулартту». Гьамин, мукунсса учкъуланугу лакран, Зайдул хIарачатрайну, гьарца гъинттул «ХьхьирицIсса лакку ккурчIа» шайва. Щаллусса гъинттул гиккун батIлай бивкIминнан лакку маз итххяххан бан ва ишираву ххуйсса кумаг шайва.
Цайвасса лаккучушиврул бурж Зайдул цанма Аллагьу Тааьланал буллусса оьрмулул лахъишиврий узданну лавхъссар, лаккулугърал гьиву хIучI къакуну ларсъссар, Кьиямрал ЦIуххалдарайгу Зайду лажин кIялану ва сивсуну ацIантIиссар.
Гъумучиял щар арулва махIлалийх – жяматирттайх дарчIуну духьувкун, хъинну бусраврай, ца хьхьичIунайсса гъанчу куна хIисав айва Зайду. Цинявппа лакралгу, махъ бакъа, хIакьсса жяматрайчуну ккалли ан бюхъанссар дакIния къауккайсса Ккурккуллал Зайдугу. Зайду жулва миллатрал ва лакку мазрал уттавашиврул ца яргсса лишан хъанай ия. Мукунсса лишанну жула дянив чIявусса бизаннав ва тачIав бухкъалаганнав.
Зайдун къабуллумур оьрму мунал махъминнан, гъан-маччаминнан, шяравуцириннан, ккурккуллан булуннав! Оьрмурдай барачат бишиннав!
Жунгу, диндалул уссу, ина алжаннаву хьунаакьин, лув лякъин нясивну лякъиннав!
Нагу вил Гъумучиялмур (Лурттущиялмур) махIлалиясса жяматрайчу Явюбукухъал Эса
2019-2020 ш.ш.
