Инсаншиврул ва чувшиврул дарсру

Дагъусттан миллатирттачIа дянив мудангу сийлий дуссар патриотшиву, муницIун дархIусса аьдатру. Миннул оьрчIнияцIава инсаннаву хIасул байссар нину-ппу, ниттил маз, буттал улча, тIабиаьт, ватанлувтал, миллатрал культура ххирашиврул асарду.


Хъуними никирттал барашиндарайн бувну, патриотизмалул гьануну хъанахъиссар цалва кулпат хIурматрай, сийлий бушиву, мунил цIа узданну ядаву. Инсан хIасул хъанай ур кулпатраву, ми­чча уклай ур жяматравун, ялагу зана хъанай ур кулпатравун. Кулпатравусса тарбиялул дарсруну хъанахъиссар чIивинияцIава оьрчIан бувчIин буллалаву ас-намусрал, адав-имандалул ххазинартту.
Дагъусттанлувтурал ляличIину­расса къулагъас дуллай бивкIссар кувннал кув бугьаврил, чIарав бацIаврил, цалва кулпатрайн дакI тIайлашиврул асарду чантI учин баврих.
ОьрчIаву ватан ххирашиврул асарду хъиннува цIакьгу, гужлангу баншиврул бутта, цува чун-унугу нанийни, оьрчIай бишайсса бивкIссар къатлул чувнал буржру. Хъунама арснахь чайсса бивкIссар: «Утти инара ичIува бу­ттан кIанайма, ниттин буллалу кумаг, дуручча ичIалу» — куну.
Шяраваллил бугьара­сса чивар­кIунналгу цIа дайсса диркI­ссар нитти-буттан ичIаллил давур­тту бартдигьин кумаг буллалисса оьрчI-душния. Ппу хъунав хьувкун, хъунама арснал бугьай­сса бивкIссар мунал кIану, дайсса диркIссар буттал дайсса цинярда ичIаллил давуртту.
ОьрчI-бакI тарбия баврил ххуллий хъунмасса кIану бугьлагьиссар Дагъусттаннал миллатирттал тухумирттал аьдатиртталгу. ЧIявусса агьлу бусса тухумру ккалли бай­сса бивкIссар дан-дитан каши ххи­сса чиву сивсуну махъ бусан ва буруччин шай­сса тухумран. Тухумру цивппагу бикIайсса бивкIссар махIла-махIлалий. Тухумравасса ца инсаннал къаххуйсса къел дарча, тухумрал хъуниминнал чайсса бивкIссар: «Ина жула тухум кьюкьин мабулларда, жула цIа-бакI зия мадулларда!» — куну.
Ватанчишиврул буржну ккалли байсса бивкIссар цалва тухумравасса инсантурал хъин-хъинсса давуртту щаллу даву, кулпатрахлу, тухумрахлу, жяматрахлу, Ватандалухлу жан дулун хIадурну ушиву.
ХIакьину, бугьараминнал хIакьсса ватанчишиву ккаккан дуллан аьркиншиврия ихтилат багьувкун, оьрчI-бакI тIайласса ххуллий тарбия буллалаврия ихтилат най бухьувкун, педагогтуралгу, тарбиячитуралгу, нитти-буттахъалгу къулагъас цукунчIав чан хьун къабучIиссар Дагъусттаннал миллатирттал лавгмур оьрмулувасса чувшиврул ва виричушиврул дарсирдах.

Шайдабег Мирзоев, ДГПУ-лул профессор
Таржума ХI. Аьдиловлул