Хъунмасса Буттал кIанттул цIанийсса дяъвилий ххувшаву ларсун 75 шин шаврицIун дархIусса давурттал лагрулий Ккурккуллал шяраваллил библиотекалий хьунни жула тарихраву
чувшиврул ва зулму-къиялул лажин чирчусса, Освенцим дуснакьравуми тархъан бувсса ва Ленинград блокадалуща ххассал бувсса иширттан хас дурсса мероприятие.
Андриана Аьбдуллаева
Ва сакин дурну дия шяраваллил библиотекалул хъунмур Сияли Аьбдуллаевал ва Культуралул къатлул художествалул каялувчи Аймисай Аьбдуллаевал. ТIиртIуну дия дяъвилул луттирдал выставка. Зияратран бивхьуну бия блокадалувусса Ленинградуллал агьулданун буллай бивкIсса кунмасса лухIи ччатIул касакру.
Мероприятиялий гьуртту хьунни шаэр, педагог, патриот Даниял Магьдиев, учительтал ва дуклаки оьрчIру. Сияли Аьбдуллаевал бувсунни дяъвилул шиннардий Польшанал аьрщарай фашистурал тIивтIуну бивкIсса Освенцим тIисса концентрацион лагерьдания, мивун багьминнай фашистурал буллай бивкIсса зулмулия.
— КIилчинсса дунияллул дяъвилул шиннардий Освенцим бивкIссар яла хъунмамур концентрационный лагерь.
13-20 азара инсан цал архIал ивкIссар ва лагерьдануву, хъунмурчIин Польшанал ва Совет Союзрал агьлу. Освенцимрал узниктал ххассал бувссар ЯтIул Аьралуннал 1945-ку шинал 12-мур январьдания байбивхьуну 3-мур февральданийн бияннин, — бувсунни ванил.
Даниял Магьдиевлул дакIнийн бувтунни, Польшанавун экскурсиялий лавгсса чIумал, та бивкIулул лагерьданий цанма ккавкмур, бувсунни тай гьарзат асар хьуну чивчушиву цала «Освенцим дуснакь» тIисса поэмагу. Дуклаки оьрчIал бувккунни поэмалувасса парчри ва дяъвилухасса назмурду. Хъирив Аймисай Аьбдуллаевал бувсунни Ленинградуллал блокадалия.
-Ленинград шагьрулухсса талатаву хьуссар Буттал кIанттул цIанийсса дяъвилий яла лахъи ларгмур. 1941-ку шинал сентябрь зуруй дайдирхьусса блокада 872 гьантлий лахъи ларгссар. Инсантурай гужсса къия хьуссар. Ноябрь зуруя байбивхьуну, инсантуран 200 грамм дусса ччатIул касакру буллан бивкIссар. Халкь ккашил кьатI хьуну най бивкIссар. Шагьру блокадалуща итххяххан бувссар 1944 шинал январь зурул 27-нний, — кунни Аймисайл.
Учительтурал Милада Гъужиевал ва Оксана Гъужиевал бувсунни дуклаки оьрчIахь Хъунмасса Буттал кIанттул цIанийсса дяъвилий совет халкьуннал ккаккан дурсса чувшивурттая. ЛивтIуминнал аьпалун баян бунни минутIрайсса пахъ багьаву. Ихтилатру къуртал хьуну махъ дуклаки оьрчIал ххал дунни луттирдал выставка.
