Ухссавнил Ккавкказнаву яла хъунмурну хьунтIисса уссал фабрика буллай байбивхьуну бур МахIачкъалалив.

Республикалул промышленностьрал ва энергетикалул министрнал хъиривчу Батир Эмеевлул баян бунни гьанурду буклай байбивхьушиву ва февраль зурул ахирданий цалчинмур зиву къуртал дувантIишиву. «Фабрикалий 300 инсаннансса зузи кIану хьунтIиссар, харжгу 50 азарда къурушраяр чан бакъасса бикIантIиссар, региондалул бюджетравунгу цIусса налогру дачинтIиссар», — тIий ур Эмеев.

Шамил Илиясов: «Хъун бизнесрал чIири бизнес дюкьантIиссар, «Ашандалул», «Эльдорадолул» кунна. Хаснура къия хьун най дур лакрай, лак бурхха усса­хун багьну. 300 зузи кIану – ми чIявуссарив? Цалва гъан-маччамири миккун кьамул бувантIимигу. Лакрал мюрщи цехру бюкьан нани­сса аждагьари му фабрика. ХIукуматрал буми цехирдан кумаг бувссания ялунгума, миннаща ччатI къазехлай. Сантирайн давугу руртун, муштариталгу лявкъуну, зузисса, биялсса захIмат бивхьусса, бюхъай-шай буллалисса инсантал къаххари хьунсса хавар бур».

Муъминат Валиева: «Гьакссагу ххуйсса хавар бур. Му лакрал фабрика хьунтIиссар, лакрал кунмасса уссал ус­ттартал чув буссар. Масалдаран, Каспийскалий чIивисса цех бур «Берцы» тIисса, хъинну ххуйсса усру дуллали­сса, мукунсса качествалул усру дулларча фабрикалулгу, хъямала дуллантIиссар усру. ЗахIматрал стажгу бикIанссар, хIукуматрая да­гьаймургу, отпускругу дикIанссар. Так, бувайхту, му фабрика пишакартура­хьхьун булурча, гьай-гьай!».

Расул ХIусайнов: «ДикIуча конкуренция! Цуксса гужсса конкуренция дурив, муксса уссал даву гьаз хьунтIиссар. Зузича мюрщисса цехругу, зузича фабрикагу. Агьалинал цалла язи дугьланссар усру щилми машан ласлан­ссарив».

«Фейсбукрая» хIадур
бувссар П. Рамазановал