Лакрал театрданул цIу буккан бунни Сибирбаг Кьасумовлул пьесалийнусса спектакль «Ччаву ва макь». Спектакльданул цалчинсса премьера хьуссия 2007 шинал, кIилчин цIу буккан бувссия 2014 шинал.
Зулайхат Тахакьаева
ЦIу буккан бунни уттигу. Режиссер – Дагъусттаннал халкьуннал артист Аслан МахIаммадов. Сценография – Дагъусттаннал лайкь хьусса художник Аскар Аскаровлул. Спектакльдануву гьануну лавсун бур XIX-мур ттуршукулул кIия хьхьичIунсса лакрал шаэртурал, Гъумучиял ПатIиматлул ва Бархъаллал Маллайл чагъарду – чулийн къабувксса ччаврил пашмансса кьадар.
Хантурал авладраясса хъуни къатрал душнин, аьщун кунна, эшкьи хьуну дур Бархъалатусса хъудугьул кулпатравасса жагьилнах, цина ххалагу къавхьуну унува, анжагъ Гъумучиял мизитраву «акбар» тIий чIу бавну.
Душнил шеърирдай чичлачисса чагъардал дакI гьулусан дурсса жагьилнангу эшкьи хьуну дур ганих. Мяйра шин ларгун дур гайннал цаннал цанначIан машрикьуллал ччаврил лирикалул зумуну шеърирду чичлай. Хантурал нясавраясса къудурсса ПатIиматлул нину Аймисай (Дагъусттаннал халкьуннал артистка Жинасат ДинмахIаммадова), душ эшкьилул цIуцIаврил кьавкьун най бушиврия буруккинттарай бакъарча, душ укунасса малланан щар булун кьюкьлай бур. Маллайя арх буцан баншиврул, ниттиуссичIан Азайнив тIайла буклай бур.
Душнийсса хIал чIалай, ниттиуссил учIан ай Бархъалату Маллай, гайннал ташу бансса ихтияр дуллуну. Микку ниттил макру бувну, Малла ПатIиматлуя арх уцан ай. Ччиссанная махIрумсса оьрмулул мяъна къачIалай, ПатIимат, загьру хIавчIун, ниттихагу зайлай, ниттил карунниву бивчIай.
Гъумучиял ПатIиматлул ва Бархъаллал Маллайл чагъарду Дагъусттаннал поэзиялул ца яла яргсса ирсиран ккалли хьуну бур. Гъумучиял ПатIиматлул роль дургьуну бия Дагъусттаннал лайкь хьусса артистка Зинаида Чавтараева. Бархъаллал Маллай – артист Адам ХIайдаев.
