[dropcap]Я[/dropcap]нварь зурул 29-нний цIуминалийсса ЦIуссалакрал райондалул «Новострой» трестрал къатраву хьунни Ххувшаврил 75 шинал юбилейран хас

бувсса тарих лахьхьаврил форум. Форумрал сакиншинначитал хьунни Лакрал жагьилтурал ккуран, «Вир­ттал» тIисса жяматийсса клуб ва ЦIуссалакрал райондалул администрация.

---

Шикку гьуртту хьунни Лак­рал жагьилтурал ккурандалул хъунама Давуд Амиров, ЦIуссалакрал райондалул Культуралул, спортрал, туризмалул ва жагьилтурал политикалул управлениялул хъунаманал хъиривчу Заур МахIаммадов, тарихчи, хIакин Исмяил Аьлиев, цIуминалийсса ЦIуссалакрал Чапаевкаллал школалул директор Камил АхIмадов, тарихчи Ися Аьзиев, цIуминалийсса школардал учительтал ва дуклаки оьрчIру.

Форум тIитIлай, ванил мурад бувчIин буллалисса ва лак­рал жагьилтурал ккурандалул хьхьичI бивхьусса масъаларттая бусласисса ихтилат бунни Давуд Амировлул.

Хъирив Буттал кIанттул цIа­нийсса дяъвилий Дагъус­ттаннал халкьуннал, хаснура лак­рал, дурсса чувшиврия бувсунни Ися Аьзиев­лул.
— Щала Дагъусттанная Хъунмасса Буттал кIанттул цIанийсса дяъвилий гьуртту хьуссар 180 000 инсан, зана къавхьуссар 90 000. Цинявппагу миллатирттавагу яла чIявусса гьуртту хьуну бур жула лакрава – 6500 инсан, зана къавхьуну ур 3500. Жула миллатрава увкссар 5 Совет Союзрал Виричу. Дяъвилий ккаккан дурсса къучагъшиврухлу 163 лаккучу лайкь хьуну ур личIи-личIисса орденнан ва медаллан. Дяъвилул тарихрая бусласийни мудангу кIицI лаглай бур Москав, Сталинград ва цаймигу шагьрурдахлусса талатавуртту. Ккавкказ мюхчан буллайгу миннуярдагу ягинсса талатавуртту хьуссар. Ккавкказ буручлай наградартту лайкь дурминнавугу 1340 лаккучу ур.

Та дяъвилул шиннардий лакрал миллатрал чулуха диркIссар хъин-хъинсса сиптарду. Фронтран кумагран хьхьичIра-хьхьичI лакрал миллатрал рартIун диркIссар Гьарун Саэдовлул цIанийсса авиаэскадрилья бансса арцу. Ялагу вайнналва сипталийну сакин бувну бивкIссар «Лакрал колхозник» тIисса эскадрилья. Севастополь шагьру душманная мурахас був­сса чIумал, Карашрал жямат шагьру цIу буккан бан­сса сипталущал бувккун, 100 азарда къуруш арцул рартIссар. Му сипта кьамул дурну, цинявппагу дагъусттанлувтурал рартIун диркIссар 4, 500 миллион арцул, 12 вагон дуки-хIачIиялул ва захIматрал ярагъуннил.

Жула лак хьхьичIунну зий бивкIссар захIматрал фронтрайгу, 5955 лаккучунан дуллуну диркIссар «За доблестный труд в ВОВ» тIисса медальлу. Тай шиннардий Лакрал район шамийла лайкь хьу­ссар ПаччахIлугърал обороналул комитетрал чулухасса занази ЯтIул ттугълин ва му райондалучIа ливчIссар, — бувсунни Ися Аьзиевлул.
Италиянал Виричу ХIасан-ХIусайн Камаловлуятугу бувсун, Ися Аьзиевлул маслихIат бунни Лакрал жагьилтурал ккурандалухь, хIакьинусса кьинигу Италиянал музейраву дирхьусса жула Виричунал награда Ватандалийн ласун­сса хIарачат бан.

Сурхайхан 1-нал цIаницIун бавхIусса Дагъусттанналгу, лак­ралгу тарихрая бусласисса ихтилат бунни Исмяил Аьлиевлул. Ванал ккаккан дунни тарихрал гьайкаллал суратру ва дунни миннул хIакъиравусса бувчIин бавуртту.
Хъирив Хъун дяъвилия бусласисса ихтилат бунни Камил Аьлиевичлул. Ванал барчаллагь увкунни дуклаки оьрчIан хайр-мюнпатсса форум бувминнахь.

— Укунсса мероприятиярттал хъуннасса агьамшиву дуссар оьрчIру Ватан ххирану тарбия бавриву. На мудангу хIадурссара укунсса мероприятияртту дуллалисса жагьилтурал чIарав ацIан ва ми жула школалий кьамул буллан, — увкунни ванал.
Ихтилатру къуртал хьуну махъ хьунни «Дагъусттаннал тарих цIу буккан баву» тIисса проектрал лагрулийсса конкурс. Тарих лахьхьаврин хас бувсса конкурс байбивхьуну буссия ларгсса шинал сентябрь зуруй. Конкурсрал хIасиллая бусантIиссар февраль зурул 18-нний МахIачкъалалив «Дусшиврул къатраву» хьунтIисса шадлугърал мажлисрай.

Андриана Аьбдуллаева,
Имара Саидова