[dropcap]Ф[/dropcap]евральданул 17-нний Дагъусттаннал БакIчи Владимир Васильев хьунаавкьунни жула республикалийн къуллугърал аьрххилий увкIун ивкIсса АьФ-лул просвещениялул министр Сергей Кравцовлущал.
Хьунабакьаврий гьуртту хьунни мукунма ДР-лул ХIукуматрал Председатель Артем Здунов, мунал хъиривчу – ДР-лул дуккаврил ва элмулул министр Уммупазил Оьмарова ва цаймигу.
Сергей Кравцовлул хъинчулийсса кьимат бивщунни Дагъусттаннал дуккаврил лагрулий дуллалисса давурттан: «Жун чIалай бур цIусса школартту буллай бушиву ва духлаган дуллай бушиву шанна чIумух дарсру дишаврил низам. Мунияр ххишалагу жу ххал бигьарду школарттал автобусирттал масъала. ЦIана школарттай зий бур нигьачIаву дакъасса цIусса автобусру. Ттун бувчIуссаксса, сайки 100 автобус машан лавсун бур республикалий налогру гьарзану дучIан дурсса арцух», — увкунни Сергей Кравцовлул.
Федерал министрнал бувсунни мукунма школартту луттирдал щаллу баврил хIакъиравугу: «Му масъалагу ца захIматссаннун хIисавну бия, утти мугу дузал хьуну бур», — увкунни мунал.
Сергей Кравцовлул тIимунийну, Дагъусттаннай ЕГЭ дуллай бур марцIну, тIайлану. Утти даву дачин дуван аьркинну дур дуккавриву махъун багьлагьисса оьрчIащал, мукунна миннал учительтуран кумаг буллан бур методикалийну.
Яла Владимир Васильевлул бувсунни школарттан меценатътуралгу арцуйнусса кумаг бувну бушиву, 50 млн. личIи бувну, миллатирттал мазурдийсса луттирду итабакьин.
Артем Здуновлул, аьщу-ххуттай авцIуну, ихтилат бунни дурсса давурттал хIакъираву. Мунал тIимунийну, национал проектирттайн бувну, гьашину ва ялунчIил бувну бакIуйн буккан бантIий бур 20-нния ливчусса школартту, миннуха цIана зий бур.
Хьунабакьаврий Владимир Васильевлул сукку бунни зунттал районнай школартту бувансса аьрщив личIи даврил чулухасса захIматшивурттая. Сергей Кравцовлул бакIрайн лавсунни му масъалагу дузал буван кумаг бантIишиву.
