Ларгсса бигьалагай кьини, февральданул 2-нний, МахIач­къалалив, «СМИТ» тIисса центрданий, хьунни Совет Союзрал кIийла Виричу

АхIмад-Хан Султан дакIнийн утлатисса мероприятие. Ванил сиптачигу ия 1-мур ЦIувкIратусса студент, «Ттул Лакку билаят» ккурандалул хъунама АхIмадхан Муртаев.

---

ПатIимат Рамазанова
Шикку бувсунни Виричунал оьрмулул ххуллия, ккаккан дунни АхIмад-Хан Султаннуясса документалсса киносурат.
ЦIувкIуллал Жяматий­сса со­ветрал вакил, профессор Аьб­дурахIман Халиловлул цалвамур ихтилатраву бувсунни Къиримнавугу АхIмад- Хан Султаннун гьашину хьунтIисса 100 шинан хас дурсса мероприятияртту хIукуматрал хъуни къуллугъчиталгу гьурттуну лахъсса даражалий дуван хIадур хъанай бушиву.

— ХIасул буван аьркинни юбилейраха зунсса Сакиншиндарал комитет. Къиримнавугу паччахIлугърал лагрулий юбилей дуллан най бухьувкун, жулламур республикалийгу дуллантIисса мероприятияр­ттал программа, тайннащалгу маслихIат ккавккун, сакин дуван аьркинни, тайннайнгу жучIанма оьвчиншиврул, Дагъусттаннал делегациягу Къиримнавуми мероприятиярттай гьуртту хьуншиврул. ХIарачат буван аьркинни ЦIувкIрав тIитIин Алупкалийсса Виричунал цIанийсса музейрал филиал, — увкунни АьбдурахIман Халиловлул.

«Аметхановцы» тIисса Да­гъусттаннал жагьилтурал ккурандалул хъунмур Лаура Кьурбановал бувсунни МахIачкъалаллал 1-мур школалул дуклаки оьрчIру хIадур хъанай бушиву Виричунан хас дурсса мероприятие республикалул лагрулий дуван, бувсунни АхIмад-Хан Султаннул цIанийсса школардай (Каспийскаллал №8 лицейравугу, ЦIуминалийсса ЦIуссаккуллал школалийгу ва цаймигу школардай) дикIантIишиву мероприятияртту.

[dropcap]М[/dropcap]укунма ихтилатру бунни профессор МахIаммадбаг ХIусайхановлул, ЦIувкIуллал активистътурал – Супиян Оьма­ровлул, МахIаммада Рама­­­зановлул, тарихчи ва жяма­тийсса ишккакку Исмяил Аьлиев­лул, МахIачкъала шагьрулул жагьилтурал парламент­рал хъунмур Аьйша Жалаевал. Виричунал маччачу Сайдун ХIажикьурбановлул барчаллагь увкунни ва мероприятие дуван дакIнийн багьсса студент АхIмадхан Муртаевлухь.

— Жула Дагъусттаннал хъунасса арснал хъуннасса юбилейрал ххуллий лагма лавгун, жува циняв цачIунмай хьун аьркинну, бюхттулсса арснал 100 шин бюхттулсса даражалий дуван. Ттул хъунмасса умуд бур АхIмад-Хан Султаннул 100 шинал юбилей республикалий лайкьсса даражалий кIицI лаганссар тIисса, — увкунни С. ХIажикьурбановлул.