[dropcap]Я[/dropcap]нварьданул 28-нний ХI. ЦIадассал цIанийсса Мазрал, литературалул ва магьирлугърал институтраву хьхьичIми шиннардий дурсса хъиривлаявурттал хIасиллан хасъсса элмийсса батIаву хьунни.

---

З. АьбдурахIманова
БатIаврий гьуртту хьунни РАН ДФИЦ-рай чIумуйну ивтсса каялувчи Акай Муртазяевгу. Шикку гьуртту хъанай бия жула цIанихсса аьлимчу Эса Аьбдуллаевгу, АьФ-лул магьирлугърал лайкь хьусса зузала Гулизар Султановагу.
РАН ДФИЦ-рал циняв инс­титутирттаву январьданул 28-нния февральданул 7-ннин нантIиссар укунсса журалул аьлим­турал советру бавтIсса элмийсса конференцияртту.
БатIаву дайдишин хьхьичI дакIнийн бивчуна вайннал ларг­мур шинал цала дянива лагсса аьлимталгу, миннавух филологиялул элмурдал доктор Сулайман АхIмадовгу.

Акай Муртазяевлул февральданул 8-нний жула билаятрай кIицI лагайсса Аьрасатнал элмулул кьинигу чIумуйра барча дурну, маслихIат бувна элмийсса зузалтрахь грантру ласун баян бувсса конкурсирттай гьурттушинна дуллан.
— БувчIлачIисса зат бур жунма гьарнан, мазраха, литературалуха ва магьирлугъраха зузиминнаннияр, физикалул элмулуха зузиминнан бигьашиву ва къулайшиву билаятрал даражалийсса цумур-цагу конкурсрайн буккан. Мазрал, магьирлугърал элмулухьсса каширду ссуссукьусса, дазу-зумарду къумасса дур, вайми элмурдал хьхьичIсса гьартасса дунияллух бурувгун, — увкуна ванал.

Хъирив институтрал отделлал хъуниминнал элмийсса пишакартурал ттинин дурсса хъиривлаявурттая, цала хьхьичIсса масъаларттая ва «цIуцIи кIан­ттурдая» бусласисса ихтилатру бувна. 2019 шинал дагъу­сттан мазурдил грамматика ххал дигьавриву дурсса давурттая бувсуна мазрал отделданул хъунама М. Аь. МахIаммадовлул, Да­гъусттаннал мазурдил лексикографиялия ва лексикологиялия бувсуна М.Ш. Халидовлул.
ЧIявуминнал тикрал буллалимур буруккингу бия элмулувун жагьилсса пишакартал най бакъашивриясса.

Цинявннал кIицI лаглай, пахрулунсса иширан ва хъунма­сса захIматран ккаллий буллай бия ларгсса шинал итабакьин бювхъусса Э. Аьбдуллаевлул ­«Оьрус мазрал ва лакку мазрал словарь». Тираж чIирисса дуну, ттигу чIявуминнахьхьун кка­ккан ва канил бугьан къабиривсса лу бия ва.
БатIаврил ахирданий элмий­сса пишакартурал дянив ихтилат­ру хьуна.