Поэзиялул ва дусшиврул мажлис

Тталаткьини МахIачкъалалив Дусшиврул къатлуву хьунни Дагъусттаннал халкьуннал шаэр Сугъури Увайсовлул юбилейрацIун дархIусса творчествалул вечер. Гьашину шаэрнан бартлаглагиссар оьрмулул 85 шин.

Андриана Аьбдуллаева
[dropcap]В[/dropcap]ечерданул сакиншинначитал хьунни МахIачкъала шагьрулул оьрчIал библиотекалул зузалт. Мажлисрай гьуртту хьунни философиялул элмурдал доктор, профессор Асият Пикьиева, Дагъусттаннал халкьуннал шаэр Космина Исрапилова, МахIачкъала шагьрулул 16-мур школалул лакку мазрал учительница ПатIимат Аьлиева.

Мажлис бачин бувну бия ЦБС-рал зузала Амира Кьурбанова. Ванил бувсунни шаэрнал оьрмулул ва творчествалул ххуллия. Шаэрнащалсса цала дусшиврия, хIала-гьурттушиврия бусласисса, ванацIун бавхIусса дакIнийн бичавуртту дуллали­сса ихтилатру бунни хъамаллуралгу. Цила ихтилатраву Асият МахIаммадовнал кIицI лавгунни шаэрнал дакIнил аьчухшиву, хъиншиву, инсаншиву.
ПатIимат Аьлиевал кIицI лавгунни цуппа зузисса школалий Сугъури Увайсов мудангу бусравсса хъамаличуну ушиву, дуклаки оьрчIан ванащал хьунабакьин гъира бикIайшиву.
Космина Исрапиловал къуртал бунни цила ихтилат шаэрнаха чивчусса «НицIавух цIу хIалану» тIисса назмулийну:

НицIирал къячIилувух
ЦIил къуса хIала дуллай,
Бувтунни ина оьрму,
Чан къааннав, Сугъурий!

Ккашилийн цIугу бичлай,
«НицI дукав» чилминнахь тIий
Хъунмасса яхI бувунни,
Чан къааннав, Сугъурий!

НицIал бувцIу мазрая
ДакIнивун бюхлан бикIай
ЦIу-цIампир бусса махъру
Чан къааннав, Сугъурий!

Дагъусттаннал хъун шаэр,
Лакрал мурхьирал къярттай,
Ттуршра шинай итаннав,
Чан къааннав, Сугъурий!

Поэзиялул мажлис чIюлу бунни 5-мур искусствалул школалул оьрчIал Даниял Шабановлул, Диана Тамадаевал ва Иман Абуковлул щаллу бувсса балайрдал.
Лакку мазрайгу, оьрус мазрайгу бувккунни шаэрнал шеърирду МахIачкъалаллал 1-мур гимназиялул, 16-мур школалул дуклаки оьрчIал.

Шаэрнахь барчаллагь тIисса ихтилат бунни оьрчIал библиотекалул хъунмур Муслимат Апаевал. Ахирданий ихтилат бунни шаэрнал цалагу. Ванал бувсунни дяъвилул шиннардийн тIайла дарцIусса цала оьрчIшиврия, школалий дук­лакисса шиннардия, танийсса зунттал щархъавусса оьрмулия, багьу-бизулия, дакIнийн бивчунни личIи-личIисса чIумал цала оьрмулуву хьусса хIазсса ишру.

Гъирарай цахва вичIи дирхьусса оьрчIахь дакI кIидачIлай, ванал бувсунни оьрчIний цува художник хьун ччай ивкIшиву. Амма му хиял барткъалавгнугу, суратру дихьлансса гъира цавува къалевшшиву. Ва тасттикь бан кунма, бувсунни ларгсса шинал ахирданий Миллатрал библиотекалуву хьушиву цала дирхьу­сса бусравсса лакрал суратир­ттал выставка. Цинярдагу сурат­ругу, миннуцIунсса шеърирдугу цачIун бувсса «ЦIарду ва цIуртти» тIисса лу дунияллийн бувкшиву. Ахирданий хъамаллуралгу, оьрчIалгу шаэрнащал суратру рирщунни.