Февральданул 19-нний ДР-лул ХIукуматрал батIаврий ххал бивгьунни республикалул инвестициярттал программа сакин даврил мухIлухIин ва социал ва инженер
инфраструктуралуцIух паччахIлугърал капитал зузи даврил масъалартту.
Муний махъ лахълай, республикалул премьер-министр Артем Здуновлул бувсунни бюджет цIакь бувну махъ аьркинну душиву цIакь дуван Республикалул инвестициярттал программагу, гьашину му цIакь дурну дур 3 шинайнсса. Жунма бакIрайва кIулну бикIан аьркинссар цуми объектру чув буван аьркинссарив. Масалдаран, ца шяраву оьрчI-бакI чанну бикIай, цамур шяраву тIурча, ми дуклай бур 2-3 чIумух. Ми шяраваллаву школартту буллан аьркинни, дуклаки оьрчIал аьдад хIисавравун ларсун.
Республикалул инвестициярттал программа сакин даврил мухIлухIиндарал хIакъираву кутIану бувсунни ДР-лул экономикалул ва территориал лябуккулул министр ХIажи Султановлул.
Мунал тIимунийну, республикалий доходру ласайсса кIанттурду гьарза баврийну 2019 шинал региондалул бюджетравун арцу ххишала дучIан дурну дур, мунияту бювхъуну бур программа бартдигьинсса арцугу гьарзану итадакьин. Министрнал бувсунни инвестициярттал программа 3 шинал мутталийсса сакин даврийну цуксса мюнпат хьун най буссарив.
БатIаврий инвестициярттал программа бартдигьаврил хIакъираву цалвамур пикри бувсунни ДР-лул ХIукуматрал Председательнал 1-ма хъиривчу ХIажимахIаммад ХIусайновлул, ХIукуматрал Председатель Артем Здуновлул, строительствалул ва ЖКХ-лул министр Малик Баглиевлул, Халкьуннал Мажлисрал Экономикалул, инвестициярттал ва ишбажаранчишиврул комитетрал председатель Муса Мащилиевлул.
Лажин хIадур дурссар
ХI. Аьдиловлул
