Хаварду – кутIану

Цайнува цува хьусса художникнал выставка
Февральданул 18-нний Национал библиотекалий хьунни Республикалул Халкьуннал творчествалул къатлул «Самородки» проектрал лагрулий дуллалисса ирглийсса выставка.

 

Ва ххуллухмур дия цайнува цува хьусса художник ХIажимурад МахIаммадовлул «Ттул улча» тIисса цIанилусса.
ХIажимурадлул чIярусса шиннур суратрищуну зий, цIанасса чIумал ва зий ур Дагъусттаннал паччахIлугърал медициналул университетраву.
Выставка тIитIлатIисса ихтилат бувна ДР-лул культуралул министрнал хъиривчу, РДНТ-лул директор Марита МухIадовал, ДГМУ-лул вакилтурал. Выставкалийн бувкIун бия Медициналул университетрал студентътал ва шагьрулул школарттал дуклаки оьрчIругу.
«Самородки» проект щаллу дуллалиссар 2013-ку шиная шиннай ва хIакьинунин мунил лагрулий хьуссар цайнува цува хьусса 30 художникнал выставка.

Украсса экскурсияртту
Ватан дуруччайминнал кьинилун хасну, февральданул 22-нний ва 23-нний МахIачкъалалив «Аьрасат – ттул тарих» тIисса Тарихрал паркраву дикIантIиссар украсса экскурсияртту – Рюриковичтурал ва Романовхъал заллавух. Му бакъассагу, февральданул 23-нний шивун увкIсса гьарцагу инсаннаща гьуртту хьун бюхъантIиссар мастер-классирттавух, дуклаки оьрчIан сакин бувну бикIантIиссар ватандалул тарих кIул-къакIулшиву ххал дуллалисса тестру, медициналул цалчинсса кумаг баврил, Калашниковлул автомат батIаврил ва ппив баврил курсру.

Совет заманнул оьрчIшиврувасса тIуркIурду
«Жула хIаятрал хъамабивт тIуркIурду» («Забытые игры нашего двора») тIисса цIанилусса проект щаллу хъанай дур жулла республикалий. Мунил автор ур Апанни Крумов тIисса жагьил. Ва проект ххув хьуну дур «Мяънардал территория» тIисса форумрал лагрулийсса Аьрасатнал грантирттал конкурсрай. Ва хьхьичIва хIаятирттаву оьрчIру буклай, машгьурну бивкIсса тIуркIурдацIун дархIусса проект дур. Хъамабивт тIуркIурду уттисса оьрчIаву машгьур баву мурадрай, проектрал авторнал сакин бувну бур миннул цIарду ва миннуй буккайсса куц чивчусса каталог ва ми оьрчIайх бачIлай ур. Авторнал ца мурад ялагу бур – телефоннахух, компьютердахух лавгсса цIанасса оьрчIал дянив гьавалийсса тIуркIурду цIуницIакул машгьур хьун баву.

Мюхчансса ххуллурду
«Мюхчансса ва ххуйсса даражалул ххуллурду» тIисса нацпроектрал лагрулий ларгсса шинал Дагъусттаннай бакьин бувну бур 110 объект (цинярдагу 72, 4 км.), миннувух – МахIачкъала шагьрулийсса кIичIирттугу.

Медициналул цалчинсса кумаг баврил олимпиада
Февральданул 21-нний, ссят 11-нний дайдирхьуну, Дагъусттаннал паччахIлугърал медициналул университетраву хьунтIиссар медициналул цалчинсса кумаг баврил олимпиада, «Ххассал ува, яува» тIисса цIанилусса. Муний гьуртту хьунтIиссар Аьрасатнал регионнаясса ва жулла дазурдачIан гъансса чил билаятирттаясса 24 команда.
Олимпиадалий хьунтIиссар МЧС-рал, МВД-лул, ФМБА-лул ва ЦIуллу-сагъшиву дуруччаврил министерствалул зузалт гьуртту­сса мастер-классру. Олимпиада хьунтIиссар шанна этапIрай.

ХIадур бувссар
Бадрижамал Аьлиевал