Ассаламу аьлайкум, ххирасса лакрал жямат
Жу мудангу кIицI лагару «Лакку билаятрал рухI» тIисса группалул цачIун бувсса оьрчIру-душру 

цинявппагу личIи-личIисса гьунарду бусса, итххявхсса бушиву. Ми цивппа бусса кIанттурдай бусравну бушиву.

---

Андриана Аьбдуллаева
ХIакьину бусан ччива шеърирду чичин, балай учин гьунар бусса, махъ-ихтилатрангу пасихIсса вихьли душ Аьбдуллаева ПатIимаяту. ПатIимал ца­ппара шеърирду «Илчи» кказит­райгу бувкссия. («Илчи» №15, 26 апрель 2019 ш.). ХIакьину ванил мукъурттийсса балайрду тIий бур лакрал балайчитурал.

[dropcap]Б[/dropcap]увну бур ПатIима пасихI­шиврул цIа ларгсса Вихьуллал шяраву, учительтурал кулпатраву. Ванил буттал МахIаммадул, аьпа баннав цал, географиялул дарс дишайсса диркIун дур, нину Сааьдат хIакьинугу зий бур. Ва байбихьулул классир­ттал учительница бур.
— Балай учаврил гьунар бу­ттайхсса бухьунссар. Ттун тIааьнну дакIнийн дагьлан дикIай, буттащал хъув, къурув лавгун, архIал балай тIий бивкIсса чIунну. Балай учайсса агьлу-авладрай яла цама акъая. Шеърирдая тIурчарив, ни­ттилгу чичай, буттауссилгу, — тIий бур ПатIима.
Шеърирду ПатIимал оьрчI­нийва чичайсса бивкIун бур. Цалчинсса шеъри (щаращуха­сса) ванил чивчуну бур 6 шинаву.

— Жул гъанчунал МахIаммад­лул щаращив бакьин байва. КIанал чIюлу бувсса караматсса щаращи ххал хьусса чIумал чивчуссия на цалчинсса шеъригу, — буслай бур ПатIима.
Вихьлив 11 классгу къуртал бувну, ПатIима бувххун бур Да­гъусттаннал педуниверситет­рал филологиялул факультет­райн. Ца курс къуртал байхтува, зун байбивхьуну бур Каспийскаллал 2-мур школалий. Микку зий ПатIимал 10 шин дурну дур. Мунияр махъ 3 шинай Механикалул техникумраву тарбиялул даврил завучнугу бивкIун, яла зун бивкIун бур Ленинккантливсса Виваллил иширттал министерствалул пишакаршиврул даража гьаз баврил центрданий. Чув бухьурчагу, цила даву лавайсса даражалий дуллалисса, жяматийсса давривугу чялишну гьуртту шайсса буну, бусравну ва хIурматрай бивкIун бур. ЦIана ПатIима ялапар хъанай бур Москавлив, зий бур «Хитоптика» тIисса салондалуву оптометристну. Шикку зуншиврул ПатIиман оптометристнал (яруннил диагноз дишайсса) пишагу лахьхьин багьну бур.

Инсантуращал хIал бавкьусса, дакI аьчухсса ПатIиман цIусса пишагу ххира хьуну бур, чIявусса инсантуращал хьунабакьлай тIий, ми рязи бан хъанай тIий, миннан кумаг бансса каши цихьра дуну тIий.

ПатIимал бур ца душ, ца арс. Душ Иза Москавлив медучилищалуву дуклай бур, арснан 14 шин дур. Ванан аьраличунал пиша язи бугьансса пикри бур. Душнилгу чичайсса бур шеърирду. ПатIиман пикри бур душнилссагу, цилассагу шеърирду цачIун бувсса жуж итабакьин. Москавлив бунугу, оьрчIангу лакку маз кIулну бур. КъакIулну вай ПатIимал цукунчIав къабитанссия. Ва бур цила миллатгу, буттал улчагу ххирасса хIакьсса лаккудуш. Му исват буллай бур соцсетирдай ва «Фатима Лакия» тIий кIулну бушиврулгу.

— На барчаллагьрай бура «Ла­кку билаятрал рухI» цIанилусса, хIакьсса лакрал патриотътал цачIун бувсса группа тIивтIусса Разитайн. Лакку мазрахсса мякь лиххан бан шай ва группалуву жап увкуну. Ялагу, ттун тIааьн бизай группалувусса цинявппа, иш багьни, кумаг бан, цаннал чIарав ца бацIан хIадурсса бушиву. «Ци аьркинни, ссан кумаг бави?» — тIий ур шиву гьарма, цуппа администратор Разитая байбивхьуну.

Группалувуми ххари бай­ссар ПатIимал, гьарицама увсса кьини мунан хас бувсса шеъри чивчуну. Миннущалгу на зу та-бунугу кIул банна.
ЦIана ПатIима цила мукъур­ттийсса балайрдал концерт дан хIадур хъанай бур.