Гьар шинах жула билаятрал хъуншагьрулий Москавлив шайссар «Шинал халкь» тIисса, личIи-личIисса арардаву зузисса циняр регионнаясса пишакартурал дянивсса конкурсрал

хIасиллу дуллалисса хъуннасса шадлугъ. ЛичIи-личIисса номинациярттая сакин дурсса ва даврил мурадгу бур конкурсрай гьуртту хьуминнал кIулшивурттал ва пишакаршиврул даражалун лайкьсса кьимат бищунсса.

Залму АьбдурахIманова
Вана ва конкурсрая, «Шинал пишакар» тIисса номинациялий ххув хьуну, ххарисса хаварданущал ва бахшиширттащал зана хьунни уттигъанну жула лакку душ, жагьилсса хIакин-гинеколог Мадина МахIмудовагу. Ва номинациялий гьуртту хьун цIарду рирщуну диркIун дия 102 инсаннал. Вайксса пишакартуравух жула душ ххув шавугу пахру бан лайкьсса зат бур.

Бувну бур Мадина Къизилюртлив, Хъанардал шяравасса Аьвдурашидлул ва Зинатлул кулпатраву. МарцIсса ххювардай Къизилюртуллал 1-мур школагу къуртал бувну, дуклан бувххун бур Аьш­ттарханнал медициналул академиялувун. 2013 шинал вагу ххуй­сса ккаккиярттащал къуртал бувну, ккалай бивкIун бур ти­ккува кIира шинайсса интернатуралий. Язигу бувгьуну бур хъаннил хIакинналмур пиша. Дуклай буна, Мадина зий бивкIун бур Аьштарханнай акушер-гинекологнугу.

2018 шинал зана хьуну Дагъусттаннайн, зун бивкIун бур МахIачкъалалив «Лекарь» тIисса поликлиникалий. ХIакиннал пиша бур мудан цIу-цIусса кIулшивурттах луглаги­сса, миннул хъирив чил билаятир­ттайнгума гьан багьайсса пиша. Чил билаятирттайн цалсса ттигу къагьарчагу, Мадинагу цIанава гьур­тту шайсса бур билаятрал личIи-личIисса регионнайсса конференциярттай ва семинар-батIавурттай. ХIакьсса хIакин хIисаврай, жула хъаннихьгу Мадина маслихIат буллай бур, цумур-цагу цIунцIия, азар лахъи лаган къадиртун, ччя-ччяни хIакинначIан бияван.

Ва ххувшавугу барча тIий, жула чулухагу чIа учин ччай бур жагьилсса пишакарнан оьрмулуву тIайлабацIу ва давриву гъира-шавкь. Мадинай, муниярдагу лахъсса даражалул ххувшавуртту ларсун, цIа ларгсса хIакин хьунугу ккакканнав!