[dropcap]М[/dropcap]ахIачкъалалив «Аьрасат – ттул тарихри» тIисса музейраву хьунни Дагъусттаннал журналистал Елена Еськинал ва Фериде Аьлипулатовал
ларсъсса «Сагъну бувкмур» («Выжившая») тIисса документал фильмрал презентация. Фильм ларсун дур личIи-личIисса чIумал Дагъусттаннай хьусса терактирдахьхьун биривминнал бусласимур гьануну лавсун.
А. Аьбдуллаева
Шикку ккаккан буллай бур Къизлардай ширишилун бувгьуну бивкIсса, Каспийскалий пограничниктурал къатри пIякь учин дурсса балаллухьхьун, мукунма 1999 шинал дяъвилул иширттахьхьун биривсса хъаннил бусласимур. Бувсун бур боевиктурал кьюкьравун лавгсса нитти-буттал оьрчIал бакIрачIан бувкIмур – 8 серия (8 хавар).
Ва документал фильм ласунсса пикри дузрайн буккан бан бювхъуну бур журналистураща Дагъусттаннал БакIчинал грант ларсун. Декабрь зурул байбихьулий фильм ккаккан дурну дур Москавлив Миллатирттал къатлуву. Автортуран пикри бур цаймигу сериярду ласунсса.
Ва кьини музейрал зал щапI куну бувцIуну бия тамашачитурал. Шиккун оьвкуну бия фильмраву гьуртту хьуминнайнгу. Сурат ххал дурну махъ вайннал ихтилатру бунни тамашачитурал хьхьичI, бувсунни цала бакIрачIан бувкIмур.
