Декабрьданул 24-нний, ДР-лул БакIчи Владимир Васильев, АьФ-лул экономикалул министрМаксим Орешкин ва Азирбижаннал Республикалул премьер-министрнал хъиривчу Шахин Мусттапаев гьуртту хьунни МахIарамккантуллал райондалий Аьрасатнал ва Азирбижаннал паччахIлугърал дазуй ламу тIитIаврий.
ЦIусса ламу бувссар 1957 шинал бувну бивкIсса ламун кIанай. Ламул лахъишиву дур 325,3 метра, утташиву – 17,5 метра. Проектрал багьа бур 36,5 млн. манат (сайки 21,5 млн. доллар). КIирагу паччахIлугърал архIалсса арцу дирчуссар ламу буван. Ламу хъанай бур «Ухссав Кьибла» тIисса дунияллул халкьуннал транспортрал коридорданул агьамсса бутIану.
ЯтIул лиссу кьуркьуну махъ махъ лавхъунни Шахин Мусттапаевлул. Мунал тIимунийну, хIакьину шиккун бавтIми хьунни агьамсса иширал гьурттучитал. Ва ламул дазлазиссар Самур неххал кIира зума ва лядуккан дуллан тIий дур машлул ва экономикалул дахIаву, мунил ххишалагу гъан бувантIиссар жула билаятру ва халкьру.
Махъ лавхъунни Максим Орешкиннулгу. Муналгу бувсунни ялу-ялун жула билаятирттал дянивсса дахIавуртту цIакьгу, гьартагу хъанан най душиву.
Хъирив махъ лахълай, Владимир Васильевлул бувсунни ванияр 2 шинал хьхьичI микку чару бацIан бувну бивкIшиву, утти ламугу бувну бушиву. «ЛяличIисса арардал дахIавуртту дур Азирбижаннал ва Дагъусттаннал дянив, тамансса дур гъан-маччашиврул дахIавуртту», — увкунни Дагъусттаннал БакIчинал.
Ламу тIитIаврий махъ лавхъунни Аьрасатнавусса Азирбижаннал посол Полад Бюлбюль-огълилгу.
Ламу тIивтIуну махъ мунийх лавгунни цалчинми хъус духхай машинартту.
