Декабрьданул 2-нний ДР-лул БакIчи Владимир Васильев гьуртту хьунни Аьбдулманап НурмахIаммадовлул цIанийсса дандибуккавурттал школа тIитIаврий.
Аьрасатнал цIа дурксса спортсменнал ва тренернал, UFC-рал чемпион ХIабиб НурмахIаммадовлул буттал цIанийсса школа цивппа заллусса хъанахъиссар. Миккун занантIиссар ММА-рал дандибуккавурттахун, самболухун, дзюдолухун машхул хьунсса кьаст думи.
Спортрал къатта бувну бур 10 зурул дянив, ванил лагру дур 1000 квадрат метра, дузал бувну бур гьарца аьркин-къарциндалул. Цал архIал миккун занан бюхълай бур 150 инсаннаща.
БавтIминнал хьхьичI махъ лахълай, Владимир Васильевлул бувсунни дандибуккавурттал школа тIитIаву республикалун агьамсса ишну хъанахъишиву. Мунал тIимунийну, Дагъусттан хIакьину хъанай бур чемпионтурал къуш, му исватну бур, Аьрасатнаву бакъасса, щалла дунияллийгу.
«Жува барчаллагь тIутIиссару цIа дурксса тренертурахь ва машгьурсса спортсментурахь – миннавух бур ХIабиб НурмахIаммадов, Забит МахIаммадшарипов, Ислам МахIачев, Рустам ХIаилов, Рамазан Эмеев, Шамил АьбдурахIманов, Муслим СалихIов ва чIявусса цаймигу.
На дакI дарцIуну ура ва школа хьунтIишиврийн хьхьичIунсса спортсментал хIадур байсса ва жулва жагьилтал тIайласса ххуллий тарбия баврил кюруну», — увкунни Республикалул каялувчинал.
Хъирив ихтилатру бунни UFC-рал чемпион ХIабиб НурмахIаммадовлул, МахIачкъалаллал бакIчи Салман Дадаевлул. БавтIминнахь барчаллагь тIутIисса махъ лавхъунни ДР-лул БакIчинал кумагчи, АьФ-лул лайкь хьусса тренер Аьбдулманап НурмахIаммадовлул.
Спортрал школа тIитIаврий гьуртту хьунни ДР-лул ХIукуматрал Председательнал буржру чIумуйсса бартбигьлагьима Анатолий Карибов, ДР-лул БакIчинал ва ХIукуматрал Администрациялул каялувчи Владимир Иванов ва цаймигу.
