«Дагъусттан террорданийн къаршину» тIисса цIанилу ларгсса нюжмаркьини МахIачкъала шагьрулул 34-мур школалий хьунни «Тебе доверяет Родина» тIисса аьрали-патриот клубрал батIаву,
цувгу хас дурсса Дагъусттанная къачагътурал кьюкьри дуккан дурну 20 шин шаврин. Цил мурадну сакиншинначитал ккаклай бур дуклаки оьрчIру тарихийсса иширттащал кIул баву, гайннаву ватан ххирашиврул асарду чантI учин баву.
Зулайхат Тахакьаева
Гьуртту хьунни муний генерал-майор Шамил Асланов, Аьрасатнал кIулшиву дулаврил хIурмат лавайсса зузала Галина Къараева, ДНЦ РАН-далул элмийсса зузала Галина Георгиева, шагьрулул школарттай ОБЖ-лул дарсру дихьлахьисса учительтал, клубрал иширттаву гьурттусса дуклаки оьрчIру.
Дачин дурну ия батIаву клубрал каялувчи, МахIачкъала шагьрулул 11-мур школалий ОБЖ-лул дарсру дихьлахьисса АхIмад Юсупов. Ванал бувсунни 1999 шинал август-сентябрь зурдардий ЦIумадиял, Бущихъиял ва ЦIуссалакрал районнай хьусса иширттая, Аьрасатнал МВД-лул виваллил иширттал аьралуннащал ва Липецкаллал ОМОН-далущал хъачIрай хъачI дирхьуну Дагъусттаннал низам дуруччай органнал зузалтрал дурсса чувшивурттая. Муния махъ дяъвилул иширттаву ливтIуми дакIнийн бичин цинявппа ца минутIрайсса пахъ багьуна.
Хъирив, 34-мур школалий ТОКС-рал кьюкьагу сакин дурну, 55 шинал мутталий муний каялувшиву дуллалисса Галина Къараевал бувсуна ЦIуссалакрал райондалийн къачагътурал кьюкьри ххярхсса ппурттуву школалул учительтурал, дуклаки оьрчIал ва нитти-буттахъал дурсса гьурттушиндарая.
КIицI лавгуна цала школалий даин хъуннасса даву дуллай бушиву хъирив нанисса ник ватан ххирану тарбия даврил цIаний.
— На пахрулий бура ттущава Дагъусттаннай цалчинминнавух ТОКС-рал кьюкьа сакин дан бюхъаврия ва му хIакьину республикалий хьхьичIунсса ххуттай душиврия, — куна Галина Къараевал.
Дяъвилул иширттая бувсуна Дагъусттаннал ополчентурал кьюкьлуй каялувшиву дуллай ивкIсса генерал-майор Шамил Аслановлулгу.
Муния махъ дуклаки оьрчIру, экрандалий суратругу ккаккан дуллай, бакIра-бакIрах буслай бия дяъвилул иширттаву гьурттушинна дурсса школалул учительтурая ва оьрчIал буттахъая.
Дуклаки оьрчIру ватан ххирану тарбия баврил ххуллийсса даврихлу школалун тапшур бунни «Тебе доверяет Родина» клубрал филиалну ккаклакишиву тасттикь буллалисса свидетельство.
Муния махъ хъамаллуран ккаккан бувна школалучIа сакин бувсса Хъун дъвилий виричушиву дурсса Совет Союзрал вирттаврал цIанийсса музей. Музейрал даврия бувсунни ТОКС-рал кьюкьлул чялишсса вакилтурал.
Мероприятиялул лагрулий хьунни оьрчIру аьралуннаву къуллугъ буллансса хIадуршинна ххал дуллалисса МахIачкъала шагьрулул школарттал лавайми классирттал дуклаки оьрчIал дянивсса конкурс.
