[dropcap]В[/dropcap]ай гьантрай Москавливсса Дагъусттаннал культуралул центрданул ва Мариян Илиясовал цIанийсса «Дараччи» клубрал Москавливсса филиалданул

сипталийну лак бавтIунни – ларгсса шинал хIасиллугу дуван ва ялун нанисса шинал дуллансса давур­ттивгу кIицI лаган. Центрданий каялувшиву дуллалисса профессор Арсен ХIусайновлул барчаллагь увкунни гьарцагу дуллалисса давурттавух чялишну гьуртту хъанахъиминнахь.

---

ПатIимат Рамазанова
— Москавлив Дагъусттаннал культуралул центр хIасул бувну 30 шин хьуссар, ва датагу лахъа-хъунну инттухуннай кIицI лаган дакIний буссару. Зувира шинал мутталий Центрданул тамансса мурадру бартбивгьуссар зунттал билаятрал культура, аьдатру ядаврил ххуллий, чIявусса агьлу яхъана­хъисса мегаполисрай Дагъусттаннал культуралий я бацIанмур бувссар. ДагъусттаннацIун дархIусса гьарцагу мероприятиялий хьхьичIунсса гьурттушинна дувайссар Центрданул вакилтурал. Ттиния тинмайгу, ва ла­кку ужагъгу ччаврий ябувну, Да­гъусттангу, дагъусттаннал культурагу гьаз дуллансса давурттаха зунтIиссару — увкунни Арсен Буйдалаевичлул.

[dropcap]В[/dropcap]а кьини сайки цинявгу ихтилатру лакрал миллатрал багьу-бизулия, хIакьинусса кьинилия, лак кувннан кув ххирану ва бусравну бикIан аьркиншиврия, гъурбатрайгу, гьар кIанайгу лак лакну личIан аьркиншиврия бия. Ялун нанисса никгу миллатирттал культуралул чулухунмай хIурмат ххину тарбия даврил хIакъиравусса бия. Ца кулпат кунма, лак ккуркки лавгсса, тIааьнсса, барачатсса дуссухали бия. Шиккува бусан, кIицI лавг­сса Центрданул ца яла чялишма член ХIажи Сулайманович Аьлиев­лул хIарачатрайну дувайссар Москавливсса лакрал гьар шинах «Илчи» кказитрал подпискагу. ДукIу ва гьашину ва давриву цаламур бутIагу бивхьунни Москавуллал «Дараччилул» душвавралгу, гьармунил дунни подписка. Вагу миллат­рал культура ядаврицIун кабакьу буллалисса, бусрав- барчаллагьрансса давур.