[dropcap]В[/dropcap]а ларгсса нюжмаркьини Национал библиотекалул конференц-залдануву чIявучин кIулсса журналист, публицист, фотограф, художник,

«Горцы» художествалул ва литературалул кказитрал редактор Марат ХIажиевлул «ЦIу» тIисса кIилчинсса луттирал презентация хьунни. Автор барчагу ан, ванал захIматращал кIулгу хьун шиккун бувкIун бия даврил уртакьтал, творчествалул халкь ва ванал гъан-маччами.

Залму АьбдурахIманова
[dropcap]Ц[/dropcap]аппара шиннардил хьхьичI­ва бувксса, вара цIанилусса цалчинмур луттиравун кунна, Маратлул кIилчинмур луттиравунгу ларсун дур цала аьрххи-ххуллурдаясса, ссапарданий хIасул хьусса асардал видурцIусса макьалартту. Пикри-зикрирдал авадансса аьрххи-ххуллурдаясса макьалар­ттугу авторнал, ца Дагъусттанная дакъассагу, мунил кьатIатуссагу чансса къадикIайссар. Маратлул цала тIийкун: «Журналистнан цала мурадрал хъирив ца аьрххилий уккаву къагьассар. Мунал щала гьунар га аьрххилия неъматгу лавсун, кьаландалул кумаграйну буккултрахьгу бусавур».

Аьрххи-ххуллурдаясса ва микку хьунабавкьусса халкьуннаясса макьалартту цачIун дурсса ва луттирал цамургу чIюлушиндаран ккалли дан бучIир шиву ишла дурсса жула цIа ларгсса фотограф Камил ЧутIуевлул, художниктал ПатIимат ХIусайновал, Закария Закарияевлул, Александр Павловлул суратру ва репродукцияртту. КIилчинсса оьрму буллусса кунна, ишла дурну дур Маратлул луттираву цала буттал ппу ХIажиев Исмяиллул 1940 шинал дурсса графикалул давурттугу.

[dropcap]Л[/dropcap]у байбихьлай бур авторнал цала чивчусса «На талихIрайн увцусса аьрххи-ххуллурду ва хьунаакьавуртту» тIисса му­къурттийну.
БатIаву дачин дурсса филологиялул элмурдал кандидат Муса ХIажиевлул цала мукъуву кIицI лавгуна луттиравусса макьаларттайну Дагъусттаннал агьалинал оьрмулиясса, багьу-бизулиясса, тIул-хасиятраясса аьмсса сурат хIасул дан бю­хъ­лахъишиву ва Дагъусттаннал кьатIувгу ва луттирайхчIин жуятува, жула щархъая, ус­ттартурая, гьунар бусса халкьунная чIявусса затру бусан бюхъантIишиву.

Цаппара шиннардил хьхьичI Гуржиянавунгу хьуссия Марат гьурттусса жула аьлимтурал, художниктурал, шаэртурал экспедициялул аьрххи. Ваниясса макьаларттугу ва луттираву хьуну дур яла яргми ва экспедициялул гьурттучитуран дакIний личIанми. Ва иширан хасну махъ лавхъсса филологиялул элмурдал доктор, профессор Эса Аьбдуллаевлул кIицI лавгуна Маратлул хъуннасса даву дуллай ушиву жула чичулт ва шаэртал республикалул кьатIувгу машгьур буллалисса, гьар шинах­сса «Тарки-Тау» луттирдал выставкалул сакиншинна дувавривугу.
— Марат ца гьунарданул инсан акъар. Ванаву цимивагу гьунар лявхъуну бур. Макьаларттугу Маратлул дикIай куртIсса мяъна дусса ва гъирарай дуккин ччи­сса. Щак бакъар кIилчинмунил хъирив шамилчинмургу, мукьилчинмургу, гания гихунмайссагу луттирду буккан бансса гъира ванаву хъунмасса бушиврийн, — увкунни Эса Аьбдуллаевлул.

Археолог Рабадан МахIамма­довлул, «ЦIу» тIисса луттиравун дагьсса макьаларттая буслай, кIицI бувна Марат гьурттуну ивкIшиву Великентрай най диркIсса цала экспедициялул археологиялул давурттавух ва аьрщи диххавривугу.
— Марат, жуяту личIи акъа, жул дянивасса ца хханссия. Ванаву жу дуллалимуних мукун хъунмасса гъира бияхха, жун ва журналист, фотограф ушивугу хъамабивтун, най уна жула кьюкьлувун кьамул увссия, — куна Р.МахIаммадовлул.

[dropcap]М[/dropcap]ахъру мукунма лавхъуна шаэр Миясат Муслимовал, художник Апанни МахIаммадовлул, фотограф Амир Амировлул ва цайминналгу.
Луттирал презентациялул ахирданий Маратлул, бувкIминнахь барчаллагьгу куну, бувсуна гьашину «Горцы» тIисса ккавкказуллал литературалул кказит буклай 10 шин хъанахъишиву ва укун уздансса даву дачин дансса гужгу, гъирагу цала лагма лавгсса дустал сававну ххишала хъанай бушиву.