Декабрь зурул 14-нний МахIачкъалалив Тарихрал паркраву хьунни фотограф-художник, коллекционер Кьурбанов Каламадин
ХIусайновичлул 70 шинал юбилейран хас дурсса выставка. Выставкалул мажлис бачин бувну ия ДР-лул культуралул лайкь хьусса зузала Ссупиян Оьмаров.
Имара Саидова
[dropcap]Ю[/dropcap]биляр барча ан бувкIун бия ДР-лул Хъунисриннал советрал председательнал хъиривчу Сиражуттин Илиясов, ДР-лул Жяматийсса палаталул председательнал хъиривчу Ссапар Аьбдуллаев, ДР-лул Культуралул жяматийсса советрал председатель, АьФ-лул ва ДР-лул культуралул лайкь хьусса зузала Салам Хавчаев, Лакрал райондалул администрациялул хъунама Юсуп МахIаммадов, ДР-лул Художниктурал союзрал председатель Кьурбанаьли МахIаммадов, ДР-лул Изобразительный искусствалул музейрал хъунмур СалихIат ХIамзатова ва цаймигу.
— Каламадин ттул чIунархIал оьрчIгу, ххаллилсса гьалмахчугу ур. Буниялагу, ва хъинну гьунар бусса фотораф-художник ур. Цувагу уссар мудангу ацIаву дакъа цала творчествалуву цIу-цIусса ххуллурду тIитIлай, цала искусство магьир давриха зий. На мудангу пахрулий ура ванаща цала язи бувгьусса пиша бусравну ккаккан бан бюхъаврия. Пикрилий ура «Планета Культура» тIисса ттула передачалийхчIин ванал бусравсса давурттая цинявгу Дагъусттаннал агьалинахьгу бусан, — увкунни Салам Хавчаевлул.
Сиражуттин Илиясовлул цала ихтилатраву кIицI лавгунни Каламадин Читтурдал жяматрал дянив хъинну бусравсса ва хIурмат-кьиматрайсса инсан ушиву.
— Гьарцагу патриотнал цащава бюхъайкунсса хайр-мюнпат биян бай цува лявхъусса, хъуна хьусса Ватандалун. Му чулуха хъинну бигьа бакъасса ххуллу бувгьуну бур Каламадиннул. Гьай-гьай, гьунар бусса унагу, гьарцама художникнаща къабюхъай цала творчество машгьур дан. Каламадин тIурча, ми иширттавугу хъинну бажар бусса инсан ур. Ва ур куртIсса пикрирду бусса, дуванмунил планну дусса, чIумуха лавхьхьуну къуццу бан кIулсса инсан. Вания тихунмайгу чIа учинну ванан цала творчествалуха зунсса гьавас тачIав къалещаву, — увкунни Сиражуттин Илиясовлул.
ЧIявуя ва кьини Каламадиннул захIматран лавайсса кьимат бишлашисса ихтилатру буллалими.
[dropcap]З[/dropcap]увинния лирчусса шиннардий Каламадиннул салкьи дурну дур Дагъусттаннал цIанихсса художниктурал суратру. Ва выставкалийгу тамашалий дирхьуну дия 160-нния лирчусса суратру. Гьай-гьай, искусство ххираминнаща бакъа, художниктурал захIматран кьиматгу бивщуну, ми кьадрулий ядан къабюхъайссар. Дагъусттаннай тIурча, Каламадин кунмасса, искусствалул кьимат кIулсса, коллекционертал нажагьсса бакъа бакъар. КIицI лаганну, дахьва байбивхьусса, инсантуравун личIину къабувксса художниктурал давуртту ванал хIарачатрай машгьур дуршиву. Ванал кумаграйнур хIакьину жучIанна дирсса ва яхьусса гьунар бусса биялсса художниктурал давуртту.
Каламадиннул цалвагу учай: «Мудангу аьркинссар художникнал захIматран кьимат бищун кIулну бикIан. Миннал творчествагу кьадрулий ядан. Ттул коллекциялуву буссар машгьурссагу, дахьва байбивхьуссагу художниктурал (А. Къардашов, М. Шабанов, З. Рабаданов, Д. Жумалиев, И. Супиянов, Х. Юсупов ва цаймигу) суратру. Мяйжаннугу, вайксса автортурал суратру цачIун дурсса выставка нажагьсса дакъа хьунакъадакьай. Щак бакъа учин бюхъанссар, Каламадиннул Дагъусттаннал искусствалул тарих ябавриву хъунмасса бутIа буссар куну.
[dropcap]К[/dropcap]аламадин увну ур 1949 шинал Лакрал райондалийсса Читтурдал шяраву. Гъумук школагу къуртал бувну, дуклан увххун ур Ленинградуллал художествалул лавайми курсирдайн. Художествалул творчествалул ххуллу байбивхьуну бур МахIачкъалаллал фотоательелия. Сурат рищаврил гьунар бусса ва художествалул искусствалул кьюлтIшивуртту куртIну кIулсса Каламадин 1973-1975 шиннардий тIалав увну ур ДАССР-данул Бытовой обслуживаниялул министерствалучIасса учебно-производственный комбинатрай фотографтурахь дарсру дихьлан. Шиккугу ванал каялувшиндаралу итабавкьуну бур фотографтурал кIива группа. АрхIала ва зий ивкIун ур «Советский Дагестан» журналданул фотокорреспондентнугу.
Муния махъ зий ивкIссар МахIачкъалаллал Дагфотообъединениялул бюрорал хъунаману.
КIицI лаганну, цIана кунмасса фотоаппаратру, телефонну дакъасса чIумал, лакрал щархъавун суратру рищун мудан ванайн оьвтIий бивкIшиву. Зунттавунсса ххуллул архшиврух ягу цаява буклакисса харжирах къаурувгун, ва мудангу лагайсса ивкIун ур зунттавун. ХIакьинусса кьинигу шяраваллавусса агьали барчаллагьрай бур ванайн цала кулпатирттал оьрмулул тарихрал лахIзарду ябаврихлу.
Живописьрал искусствалухсса гъира багьну бур Каламадиннун 1995 шинал, Дубай шагьрулий суратирттал галереялуву зузисса чIумал. Шикку зий хъун хIал къавхьуну, ванан пикри хьуну бур цува заллусса «Вернисаж» тIисса суратирттал галерея тIитIинсса. Ванал хъунмасса захIмат бивхьуну бур, жагьилсса художниктурал произведенияртту машгьур буллай. 1998 шинал Каламадиннуйн тапшур бувну бур ДР-лул МВД-лул музей сакин бан ва му суратирттайну щаллу бан. Му музей сакин бувния шинмай миккугу шанна шин дурну дур музейрал хъунаманал кумагчину зий.
Му бакъассагу, Каламадин цала коллекциярттащал гьуртту хьуссар республикалул ва щалагуаьрасатнал выставкарттай. 2008 шинал дурссар ванал суратирттал коллекциялул цалчинсса выставка.
Каламадин цимилгу чIарав авцIуссар ва спонсор хьуссар искусствалул проектирдал.
Цимурцагу ванал дуллалисса даврицIун кабакьу буллай, зунсса гъира-шавкь рутлай, хьхьичIва-хьхьичI ванал чIарав бур ххаллилсса кулпат ПатIимат ва ишин-итан кIану бакъа бутта ххирасса душру, Жамиля, Аьжа ва Диана.
